Mukhtasar Sawaneh Hazrat Maulana Tariq Jameel Sahab DB



    ▁▁▁▂▂▂▃▃▄▄⚀▄▄▃▃▂▂▂▁▁▁
     *вɪѕмɪʟʟαнɪʀʀαнмαռɪʀʀαнɪм*
              ▔▔▔▔▔▔▔▔▔▔▔▔▔▔▔▔                                                          
*HAZRAT MAULANA TARIQ JAMEEL DB*
                    
            ─┄┅━═══  ✦═══━┅┄─

❈…… .. _*Paidaish v ibtidayi Taleem _,"*

↬• Hazrat Maulana Tariq Jameel Sahab Madzillahu 12 Rabiul Awwal 1374 Hijri ,23 June 1953 ko Miya Chinu ke Qasbe Tulamba ke qareebi gaanv Raisabaad ke ek Mashoor Zamindaar gharane mai Paida hue ,

★• _ Aapke Waalid Mohatram Miya'n Allah Bakhsh marhoom Apne ilaaqe ke moazziz Aadmi they , Shuru se Unka mizaaj Deendaari ki taraf maa'il tha , Buzurgo se Talluq aur Unki Khidmat ko sa'adat samajhte they ,

★• _ *Ibtidayi Taleem _,* Lahor ke ek Model School mai haasil ki aur Fir Government College Lahor mai dakhila le liya ,Maulana Khud farmate hai'n k mere Waalid Mohatram mujhe Doctor banana chahte they ,

★ • _ Lekin Allah Ta'ala ko kuchh aur hi Manzoor tha , College mai Maulana Ka Taalimi carear shandaar raha, aur college se hi Maulana ki is Zindgi Ka agaaz hua ,Jiski badolat Aaj Bainul Aqwami Shohrat Yaafta Muballige islam hai'n ,

            ─┄┅━═══  ✦═══━┅┄─

❈…… .. _*Dawato Tablig Ka Agaaz _,*

↬• Government College mai Maulana ke Saath ek Talibe ilm Naiem Bangali padhta Tha Jo Tabligi Jama'at se Juda hua Tha ,

★• _/Wo Maulana ko Deen Ki Dawat deta aur Jama'at mai Waqt lagane ke liye zor deta , Maulana ne 1971 mai Pehla Sah Roza Lagaya aur Fir Naiem Bangali Jo k Aapka Shafeeq aur Meharbaan dost ban chuka Tha , Uski musalsal Mehnat aur Raato ki Duae'n rang laayi aur Maulana ne Tabligi Jama'at mai Chaar Maah lagaye ,

*★• _Deeni Taleem Ka Shok ,* _ Tabligi Jama'at mai Chaar Maah lagane ke baad Aapke Dil mai Qur'ano Hadees Ki taleem haasil karne Ka Shok aur Jazba paida hua aur Aapne Madarse mai dakhila lene Ka faisla Kar liya ,

★ • _ Ye Ek esa faisla tha Jisse Maulana ke Ghar wale Khususan Walid Mohatram muttafiq nahi they , Maulana ki khwahish thi k Woh Raaiwand ke Tabligi Markaz mai Taleem Haasil Kare Lekin Yaha dakhile ki digar Shara'it ke Saath Saath ek Shart ye this dakhile ke Waqt Talibe ilm ke Saath uske Walid Ka aana zaruri tha aur Walid Mohatram razamand na hone ki vajah se Saath na aaye ,Jiski vajah se Maulana ko Markaz mai dakhila na mil saka , isliye unhe Jaami'a Rasheediya Sahewaal mai dakhila lene pada ,

            ─┄┅━═══  ✦═══━┅┄─

❈…… .. _*Jaami'a Rasheediya Ka Misaali Talibe ilm _,*

↬• Aap ( Maulana Tariq Jameel Sahab Madzillahu ) Har Waqt taleem v ta'allum mai mashgool rehte , Aksar Kitaab sarhane rakhi rehti ,Zahiri Uloom ke Saath Saath Aap Batini Tatheer aur Tazkiya e nafs ke liye bhi Hamesha fikrmand rahe ,

★• _ Aap Apne Talibe ilm saathiyo mai ek Esi misaal they k bager vazu ke na kabhi sabaq padha na sunaya , Daulat ki rel pel mai khelne wale Aazma'ishi Nojawan ko Madarsa ki paband Zindgi mai Bimariyo'n aur mujahido ne ghere rakha Magar is Marde Haq parast ne kabhi Zubaan se shikwa na Kiya aur Sabr v Shukr ki Amali misaal ban gaya ,

★• _ Kuchh hi arse Baad Aapki koshish rang laayi aur Aapke Waalid Mohatram dakhile ke liye Aapko Apne Saath Raaiwand Markaz ke Madarsa Arabiya mai  tashreef laye aur is tarah Maulana Taleem v Tarbiyat ki A'ala darsgaah mai dakhil ho kar Uloome Zaahiri v Baatin ki manzile Tay karne lage ,

            ─┄┅━═══  ✦═══━┅┄─

❈…… .. _*Madarsa Arabiya Raaiwand mai Andaze Tarbiyat ,*

↬• Raaiwand Markaz mai daurane taleem Hazrat Maulana Tariq Jameel Sahab DB ne intihayi mashakkat aur mujahido Ka muzahira Kiya ,

★• _ Khaate pite gharane ke ek naazuk mizaaj Ladke ne Jis tarah Apni rawish Tabdeel ki is per sab hairaan hue , Magar kisi Kaam ke husool ke liye Deewangi aur Junoon insaan se Sab Kuchh Kara Sakta Hai ,

★• _ Jazba e khidmat Daleele Azmat hai aur Aapne khidmat ko Apna sha'aar bana liya tha ,Raat bhar Majme ki Roti pakane mai aur Baaz Awqaat Raat ko 2 baje Tak Bartan dhone mai lage rehte , Raat bhar Roti pakana aur Subeh Sabaq mai Ba qa'adgi se Shareek hona Unke mamulaat mai tha ,

★ • _ Zamana e Taleem mai Sakht Bimaari ki haalat mai bhi Sabaq mai Shareek Hote Hattaki Baaz Awqaat let Kar sabaq sunte aur padhte ,

★. _ Ek martaba jazbaat mai farmaya k maine 10 saal Madaris ke dhakke khaye hai'n, Kitaabe padhi hai'n ,ilm haasil Kiya hai ,  Musalsal muta'ala ,Mehnat aur Mujahida Kiya Hai, Lekin in sabke bavjood bhi Apne Aapko Talibe ilm samajhta hu'n , Ab bhi Apne Aapko ilm Ka mohtaaj samajhta hu'n ,

            ─┄┅━═══  ✦═══━┅┄─

❈…… .. _*Amal v Taqwa aur itteba e Sunnat ,*

↬• Jo Shakhs Jitna muttaqi aur Ba Amal hoga usi qadar uski Baato mai asar aur dard hoga , Parhezgaar Shakhs ki har Baat Sakht se Sakht Dilo ke andar bhi Utar jati hai ,

★• _ Hakimul islam Hazrat Maulana Qari Tayyab Sahab Reh. Tehreer farmate hai'n k Khitabat ke liye Buniyadi Cheez Taqwa aur Amal hai ," Maulana Tariq Jameel Sahab ko Allah Ta'ala ne in sifaat se nawaz hai aur Yahi Cheez Unke Kaamyab khateeb hone ki Buniyadi vajah hai , Maulana Khud farmate hai'n k pur asar wa'az ke liye nazro ki hifazat aur tahajjud ki pabandi akseer mujarrab Ka darja rakhti hai ,

★•_ Itteba e Sunnat Hazaar Karamaat  se badh kar Hai , Sunnat A'amaal per isteqamat ,Khane pine ,uthne bethne ,Sone jaagne , Zindgi Ke har maamle mai Maulana Tariq Jameel Sahab Ka mizaaj Sunnat ke mutabiq dhal gaya Hai, inhi masnoon A'amaal ki barkat se Allah Ta'ala ne Maulana ko Duniya bhar mai Hazaaro insaano ki Hidayat Ka zariya bana diya hai ,*
                    
            ─┄┅━═══  ✦═══━┅┄─

❈…… .. _*Bayt aur Madaris Arabiya Ka Qiyaam ,*

↬• Maulana Tariq Jameel Sahab DB ne Bachpan mai Apne Walid Mohatram ki sarparasti mai Hazrat Maulana Ahmad Ali Lahori Reh. Ke jaanasheen Hazrat Maulana Muhammad Ubaidullah Anwar Reh.ke haath per Bayt ki ,Fir Unke Baad Hazrat Ji Maulana In'amul Hasan Sahab Reh ke haath per Bayt ki , Lekin Jo Cheez Maulana ke Dilo dimaag per gaalib hai Wo Dawate illallaah aur Poore Aalam ki Hidayat ki fikr ,

★• _ Maulana Jaha'n Shab v Roz Dawato Tablig ki Mehnat ke liye Apne Aapko waqf kiye hue hai'n , iske Saath Saath Deeni Madaris ke Ahya e Nazm v Zabt aur Talba ki imaani v Akhlaaqi tarbiyat ke liye bhi fikrmand aur kosha'n rehte Hai'n ,

★• _ Maulana ki sarparasti mai Teen Madaris Ba Hasan v Khoobi Deene mateen ki taleem v Tablig ki khidmaat sar Anjaam de rahe hai'n , 1986 mai Maulana ne Apne Aabaayi qasba Tulamba mai Deeni Madarsa ki buniyad rakhi , Log joq dar joq Madarse ki taraf mutavajjah hue aur Madarse mai Kaseer Tadaad mai Talba Ka dakhila hua , Madarse mai Shara'i usool v zawaabit ki sakhti se pabandi karayi jati hai ,

★ • _ 1989 mai Ba qa'ada darja Kutub Ka Agaaz hua , Hairaan Kun Baat ye Hai k ab Tak jitne Talba Ka Madarse mai dakhila hua hai ,Unme se aksar ya to A'ala Angrezi Taleem Chhod Kar aaye ya fir Duniya ke A'ala karobaari logo ke bete hai'n , Jo khud Apne shoq v ragbat se Madarse mai dakhil hue ,

★ • _Beshumar Ameer Tabqe ke Nojawan Jo college vagera mai padh rahe they ya Mukhtalif Shobo e Zindgi mai Apni Apni pasand ke mutabiq shobe akhtyar kiye hue they,Wo in Tamaam cheezo ko Chhod kar Aalim ba Amal banne ke iraade per Amal pera hue aur Madarsa Arabiya mai dakhila liya , Haqa'iq maloom karne per pata Chala ye Sab Nojawan Maulana ke Bayanaat se mutassir hue aur Apni Zindgiya'n Deen Ke mutabiq dhaalne Ka faisla Kiya , Chunki Maulana Khud Shuru se qaurbani karte hue Aalim banne ki Raah per gaamzan hue , Raisana thaat baath ki Zindgi Chhod kar mujahidana Zindgi akhtyar ki to Allah Ta'ala ne unhe doosro ki Hidayat Ka zariya bana diya,
               
            ─┄┅━═══  ✦═══━┅┄─

❈…… .. _*❈…… .. *A'ala Hukkaam aur Kaabina ( Cabinet) Ko Dawat E Deen_,*

↬• Hazrat Maulana Tariq Jameel Sahab Madzillahu ne Zindgi Ke har shobe se mutalliq logo ko Allah Ke Deen ki Dawat di aur Nabi Kareem Sallallahu Alaihivasallam wali Mubarak Mehnat ki taraf ragib Kiya ,

★• _ September 1999 ki Baat Hai Jab Maulana ( Pakistan ke ) Wazeere Aazam se mulaqaat ke liye Prime Minister House gaye , Wazeere Aazam Miya Nawaz Shareef un dino Pareshan they , Maulana ne farmaya hamari Tamaam Pareshaniyo Ka Hal Poore Deen per Amal pera hone mai Hai ,Hum Apne har Shobe mai Allah Ta'ala ke Ahkamaat aur Rasoole Kareem Sallallahu Alaihivasallam ke Mubarak A'amaal ko zinda Kare ,

★• _Maulana ne farmaya - Janab Azaab do qism ke Hote hai'n zameeni aur Asmaani , Zameeni aafato se hifazat ke liye Huzoor Sallallahu Alaihivasallam wale masnoon A'amaal aur waza'if Ka pabandi se ahatmaam Kare aur Asmaani afaat Ka to Sirf ek hi Hal hai ," Tauba " ,

"__ Aur Saath hi Hazrat Maulana ne ek Hadees Mubarak Ka zikr farmaya k Duniya  ki Koi bhi qaum jab Masa'il Ka shikaar hoti Hai to Unke Masa'il Ka Hal Huzoor Sallallahu Alaihivasallam ne Kuchh is tarah tajveez farmaya hai , ( Hadees Bayan farmayi ) to Miya Nawaz Shareef Hadees Mubarak sun Kar chonk uthe , Masa'il aur Unka Hal Roze Roshan ki tarah Unke saamne they , Miya Nawaz Shareef Jazbaat se uth Kar khade ho gaye aur Maulana ko Gale laga Kar arz Kiya -Hazrat Aap ye Hadees Kaabina ko bhi suna de ,

★ • _ Maulana ne Wazeere Aazam ki darkhwaast qubool ki aur Kaabina ke ijlaas mai Hadeese Mubarak sunayi ,

↬• Hazrat Maulana Tariq Jameel Sahab DB ne ijlaas mai Hadeese Mubarak sunayi ,

★• _ Aapne farmaya - Ek Baddu ( Dehaati ) Rasulullah Sallallahu Alaihivasallam ki bargaah mai Haazir hua aur arz Kiya Ya Rasulallah Sallallahu Alaihivasallam Mai'n kuchh puchhna chahta hu'n , Farmaya Haa'n Kaho , Ye Hadees Mubarak Musnad Ahmad ,Kanzul Ummaal mai Hazrat Khalid bin Waleed Raziyallahu Anhu se marvi hai ,

★•_ Baddu ne arz Kiya k Ya Rasulallah Sallallahu Alaihivasallam Mai'n Ameer banna chahta hu'n ,farmaya - Qana'at akhtyar Karo Ameer ho Jaoge ,
Arz Kiya Mai'n Sabse bada Aalim banna chahta hu'n, farmaya- Taqwa akhtyar Karo Aalim ban Jaoge ,

"_ Arz Kiya Mai'n izzat Wala banna chahta hu'n, Farmaya- makhlooq ke saamne haath failana band Kar do , ba izzat ban Jaoge ,
Arz Kiya Achchha insaan banna chahta hu'n , farmaya logo ko nafa pahunchao ,
Arz Kiya- Aadil banna chahta hu'n, Farmaya- Jo Apne Liye Pasand karte ho Wahi Doosro Ke Liye Pasand Karo ,

★ • _Arz kiya - Taaqatwar banna chahta hu'n , farmaya- Allah per tawakkul Karo ,Arz Kiya- Allah ke darbaar mai Khaas darja chahta hu'n , Farmaya- Kasrat se Zikr Kiya Karo ,
Arz Kiya- Rizq ki Kushadgi chahta hu'n , farmaya- Hamesha ba wazu raho , Arz Kiya- Duao'n ki qubuliyat chahta hu'n , Farmaya- Haraam na Khaao ,
Arz Kiya- imaan ki takmeel chahta hu'n , farmaya- Akhlaaq Achchhe Kar lo ,

★. _ Arz Kiya Qayamat ke Roz Gunaaho se Paak ho Kar Allah se milna chahta hu'n , Farmaya- Janabat ke foran Baad Gusl Kiya Karo ,
Arz Kiya- Gunaaho mai kami chahta hu'n , farmaya-kasrat se istigfaar Kiya Karo ,
Arz Kiya Qayamat ke Roz Noor mai uthna chahta hu'n , farmaya - Zulm Karna Chhod do ,Arz Kiya - Chahta hu'n Allah mujh per Raham Kare , farmaya- Allah ke Bando per Raham Karo ,
Arz Kiya- Chahta hu'n Allah Meri pardaposhi Kare , farmaya- logo ki pardaposhi Karo , Arz Kiya Ruswaai se bachna chahta hu'n , Farmaya- Zina se bacho,

★• _ Arz Kiya chahta hu'n Allah aur uske Rasool Ka Mehboob ban jau'n , Farmaya- Jo Allah aur uske Rasool ko Mehboob hai use Apna Mehboob bana lo ,Arz Kiya Allah ka farmabardar banna chahta hu'n , farmaya- Fara'iz Ka ahatmaam Karo ,
Arz Kiya- Ahsaan karne Wala banna chahta hu'n , Farmaya- Allah ki yu'n Bandgi Karo Jese tum use dekh rahe ho ya Jese Wo Tumhe dekh raha ho ,

★• _Arz kiya - Ya Rasulallah ! Gunaaho se konsi Cheez maafi dilayegi ,Farmaya - Aansu ,Aajizi aur Bimaari , Arz Kiya- Dozakh ki aag ko Kya Cheez thanda karegi , Farmaya- Duniya ki musibato per Sabr ,
Arz Kiya- Allah ke Gusse ko Kya Cheez sard karti Hai , farmaya- Chupke Chupke Sadqa aur Silah Rehmi, Arz Kiya- Sabse Badi Buraai Kya Hai , Farmaya- Bad Akhlaaqi aur Bukhl ,
Arz Kiya- Sabse Badi Achchhai Kya Hai , farmaya- Achchhe Akhlaaq, Tawazo aur Sabr ,Arz Kiya- Allah ke Gusse se bachna chahta hu'n , Farmaya- Logo per Gussa Karna Chhod do __," *( Kanzul Ummaal )*

↬• Hadees Ke Baad Hazrat Maulana Tariq Jameel Sahab DB ne Kaabina ke arkaan se farmaya ,

★• _ Hum Allah Subhanahu wa Ta'ala aur Uske Rasool Sallallahu Alaihivasallam ki nafarmani karte hai'n, Lihaza Duniyavi Masa'il se kese Bach sakte hai'n ,Hum log israaf Ka shikaar hai'n Lihaza Gani kese ho sakte hai'n ,Allah ki makhlooq ke saamne haath failate hai'n Lihaza Ba izzat kese ho sakte hai'n ,

★• _ Be Wazu rehte Hai'n, Bad Akhlaaq hai'n Lihaza hamara Rizq kese Kushada ho Sakta Hai , Tawakkul akhtyar nahi karte Lihaza Taaqatwar kese ban sakte hai'n , Bad Akhlaaq hai'n Lihaza hamara imaan kese mukammal ho Sakta Hai ,

★ • _ Bando per Raham nahi karte Lihaza Allah Ta'ala hum per kese Raham Karega , Sadqaat se parhez karte hai'n Lihaza Allah ke Gusse se kese bach sakte hai'n ,

★. _ Miya'n Nawaz Shareef ne puchha - Hazrat fir Hume Allah Ta'ala ki Rehmat ke liye Kya Karna chahiye ?

"_ Maulana Sahab ne farmaya- Janab Allah Ta'ala se Tauba kare aur Awaam se Tauba ki Apeal Kare ,Allah Subhanahu wa Ta'ala Aansu bahane ,gidgidane aur maafi maangne walo ko maaf Kar Diya karta Hai , Janab Wazeere Aazam Yaqeen kar lijiye ,Ye Masa'il zameeni nahi Aasmani hai , Jab tak Allah ki madad ,Allah ki Rehnumayi aur Allah ki Rehmat nahi aayegi ,Ye Mulk theek hoga na hi is Mulk ke Masa'il khatm honge _,"

★• _ Miya'n Nawaz Shareef ne kaha - Hazrat mujhe taqreer likh Kar de , Mai'n qaum se Khitaab karunga ,aur Unse Tauba karne ki Apeal karunga ,"

"__ ijlaas khatm ho gaya ,Maulana ne taqreer likhna Shuru Kar di ,Lekin Miya'n Nawaz Shareef ki Mohlat khatm ho gayi , 
                    
           ─┄┅━═══  ✦═══━┅┄─

❈…… .. _*Khiladiyo'n , Adakaaro aur Gulukaaro Ki Zindgiyo'n mai inqelaab -*

↬• Tabligi Jama'at ki Mehnat se Ummat Ke Wo Tabqaat Jo Deen se itne door ja chuke they k unki waapsi bhi namumkin thi , Islam Ke safeer aur Deen Ke Daayi ban gaye ,

★• _ Naamwar Cricketer Saied Anwar Ka Bayan Hai k Ek baar Khail ke maidaan mai hum Ba Jama'at Namaz padh rahe they to Indian Coach Garac Chepal ne ek Saathi se puchha k ye Kya Exercise hai ? Ye Awaaz bhi bahut pyari hai ,Ye Kya nagma hai ? Usne jawab diya k jab ye faarig ho Jaye to inhi se poochhna , Chaar Paanch gair Muslim they humne unko Islam aur Namaz ke bare mai bataya ,Unme do America ke they ,Ek Germany Ka aur Do west indies ke they ,

★• _ Maine unse puchha Australia mai Islam Ka Kya haal hai ? Unhone kaha- badi tezi se fail raha Hai , Maine kaha - Kya zariya ban raha hai ? Unhone jawab diya- Hamari Shakl ke Gore Gore log aate hai'n, Bistar Unke Kaandho per Hote hai'n, Wo Jaha'n se guzarte hai'n Logo ki Daadhiya'n bad jati hai,Saro per Topiya'n rakh lete hai'n ..... Hume kuchh samajh mai nahi aata ye Kya karte hai'n ,

★ • _ Ek Mashoor Cricketer Salim Malik Kehte they k Mai'n Raat ko neend ki do do goliya'n Khaata hu'n Lekin kuchh sukoon nahi milta ,Saari Raat Aankho mai Kaatni padti hai,  is dauraan Maulana Tariq Jameel Sahab ki jama'at chal rahi thi , Unko humne kaha Chalo chalte hai'n Outing karne , Mari chalte hi hamari  3 din ki tashkeel Hui ,( Teen Din Jama'at mai ) waha'n ye haalat this Isha ki Namaz ke Baad  Hamara Dost Salim Malik kharrate le kar so raha Tha ,Wo is Baat se Hairaan rehta Tha k ye kya chakkar hai ,

★. _ Alhamdulillah Allah ke Fazal se hamari poori team ke khiladi Pakke Namazi ban chuke hai'n , Yusuf ( Muhammad Yusuf ) ne mujhe bataya k Saied Bhai ! June se ab Tak Allah ke fazal se Meri ek Raat ki tahajjud qaza nahi Hui , Chahe Match ho ya na ho ,

★• _ Sirf 2 ya 3 Sah Roza ( Jama'at mai 3 din )  lage hai'n Lekin Allah Ta'ala ne esa imaan diya Hai k un per rashk aane lagta hai ,

↬• Juned Jamshed ( Shaheed Reh. ) Ke naam se Shayad hi Koi esa ho Jo waaqif na ho ,

★• _ Mosiqi ki Duniya ke Mashoor Aadmi ko jab Allah Ta'ala ne Hidayat se nawazna chaha to kuchh logo ko iska zariya bana diya , Maulana Tariq Jameel Sahab ki unse Kasrat se mulaqate Unke Dil ko naram Kar gayi ,

★• _ Maulana Tariq Jameel Sahab DB ek Bayan mai farma rahe they k Hume Juned Jamshed ko is Mahol mai laane ke liye 6 saal Ka arsa sarf Karna pada , Juned Jamshed ki tarah shows se hi Talluq rakhne wali  Adakaara Nargis bhi Tabligi Jama'at ki vajah se Deen Ke qareeb aa chuki Hai, Usne Apne Bete aur Khawind ke Saath Maulana Tariq Jameel Sahab DB ke  group mai Hajj bhi Kiya ,

★ •_ Maulana Khud farmate hai'n k Maine Apni ahliya ke zimme Lagaya k khusoosi Tor per Nargis ki khidmat Kare , isi tarah Peahawar ki ek Mashoor Filmi Dancer Ka beta Aalim banne ke liye Maulana ke Madarse mai dakhil hua , Ese waqi'aat ne Logo ki Zindgiyo'n mai inqelaab barpa kar diya hai , 

↬• Mashoor Cricketer Saqlen Mustaaq ne bhi Tabligi Jama'at mai Chaar Maah lagaye ,Ab Unke Chehre per Daadhi aur Sar per Pagdi saji Hui Hai ,

★• _ Khud kehte hai'n k Allah Ta'ala ne mujh per Ahsaan Kiya , mere liye Hidayat ke darwaze khole ,Meri Aankhe khol di , Huzoor Aqdas Sallallahu Alaihivasallam ne Taa'if ki Waadiyo mai Patthar khaye , Aap Sallallahu Alaihivasallam ke Sahaba Rizwanullahi Alaihim Ajmaiyn ko garam Ret per ghasita gaya , Tarah tarah ki azitate di gayi ,

★• _ Ye Waqi'aat hamari Tareekh ke Sunehri Baab hai'n , aur Ek Musalman ke liye Sabr v Shukr ki alaamate bhi , Saied Anwar, Mushtaaq Ahmad ,Muhammad Yusuf ,Shahid Aafridi aur inzimamul Haq ...( Aur bhi Bahut se naam hai'n ) in sabki Zindgiya'n badal gayi hai'n , aur ye Sab Allah ke Deen Ke Daayi ban gaye hai'n , Allah Ta'ala hum Sabko Apne Deen Ka Daayi banaye aur Duniya v Aakhirat ki kaamyabiya'n naseeb farmaye , ( Aameen )

★ • _ Aur Hazrat Maulana Tariq Jameel Sahab DB ki Umar mai ,ilm mai ,Taqwa mai , A'amaal v Kirdaare hasna mai Barkat ata farmaye aur Aapko Poore Aalam mai Hidayat ke failne Ka zariya banaye , ( Aameen ya Rabbul Aalameen )

▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔
 *Mukhtsar Sawanih -Hazrat Maulana Tariq Jameel Sahab DB_,*.

☞ *Allah  Ke  Paigam  ko  Duniya  tak  Pahunchana  aur  Apne  Per  Mehnat  Karna  Hamare  Faraiz  me  Shamil  He*,
                         
              ⚀ *Talib e Dua*,
             ⊙ *Haqq Ka Daayi*,
http://www.haqqkadaayi.com/search/label/Dawat%20Tablig?m=0 
 *For all msgs Plz Visit*
*Telegram_* https://t.me/haqqKaDaayi

▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔▔            
☆