AQAA'ID

✯✰✮

       ✮~~~~✮~~~~✮~~~~✮
        *Bismillahirrahmanirrahim*
       ✮~~~~✮~~~~✮~~~~✮

                 *```✧ Aqaaid ✧```*

*❧ Aqaaid :* Aadmi jin Deeni baaton par dil se yaqeen rakhta hai, un ko "Aqaaid" kehte hain.

*❧ Hadees :* Hazrat Umar Raziy Allahu Anhu bayaan karte hain ke ham Rasoolullah ﷺ ki khidmat mein haazir the, ek shakhs ne aa kar Aap ﷺ se daryaaft kiya ke mujhe bataaiye Imaan kya hai? Aap ﷺ ne farmaaya: Imaan yeh hai ke tum Allah ko, us ke farishton ko, us ki kitaabon ko, us ke Rasoolon ko aur Qayaamat ke din ko haq jaano, haq maano aur har achchhi buri tqdeer ko bhi haq jaano, haq maano.

           [Sahih Muslim : 102]

❧ Islaam mein aqaaid ki bahot ziyaada ahmiyat hai, balke Deen ki bunyaad hi aqaaid par rakhi gai hai, yahi wajah hai ke jab bhi kisi qaum ke aqaaid mein fasaad aur bigaad paida huwa, to un ki islaah ke liye Allah Ta'ala ne Nabi aur Rasool ko mab'oos farmaaya, saare paigambaron ne apni qaum ko aqaaid durust karne aur sahi aqeeda par mazbooti ke saath jame rehne ki daawat di.

 
❧ Qur‘aan wa Hadees mein bhi aqaaid ke mutaalliq baatein intehaai wazaahat ke saath aur bade muassir andaaz mein bayaan ki gai hain, jaise Allah ki wahdaaniyat aur us ki zaat wa sifaat par Imaan laana, aasmaani kitaabon aur Rasoolon ke barhaq hone ka yaqeen rakhna, Aap ﷺ ke aakhri Nabi hone aur Qur’aan ke aakhri aasmaani kitaab hone ka aqeeda rakhna aur farishton aur aakhirat ke din par Imaan laana wagaira.

❧ Ek jagah Allah Ta'ala ne irshaad farmaaya: Aye Imaan waalo! Allah par Imaan rakho, aur us ke Rasoolon par aur us kitaab par jo Allah ne apne Rasool par utaari hai aur har us kitaab par jo us ne pehle utaari thi. Aur jo shakhs Allah ka, us ke farishton ka, us ki kitaabon ka, us ke Rasoolon ka aur Yaum-e-Aakhirat ka inkaar kare, to woh bhatak kar gumraahi mein bahot door ja pada.

           [Sura-e-Nisa: 136]

❧ Aqeeda ek aisi bunyaadi cheez hai, jis mein zarra baraabar bhi kami wa ziyaadati ki gunjaaish nahin, thoda sa tazalzul bhi bade khasaare aur nuqsaan ka baais hota hai. Aqaaid ka aamaal se bhi bahot gehra ta'alluq hai, bade se bada amal bhi Allah ke yahaan aqaaid ki durustagi ke bagair qubool nahin hota.

❧ Maslan agar koi aadmi Allah ko na maane, us ke saath kufr wa shirk kare, ya Huzoor ﷺ ko aakhri Nabi aur Rasool tasleem na kare aur Aap ﷺ ke baad kisi bhi tarah se Nabi ke aane ka aqeeda rakhe, to phir woh shakhs chaahe jitna achchha kaam kare, Allah Ta'ala ke yahaan badle ka mustahiq nahin hoga aur use koi sawaab nahin milega.

❧ Is liye hamein aqaaid par poori mazbooti ke saath jame rehne aur un ko apne dil mein bithha lene ki zaroorat hai, taake hamaara Imaan durust rahe, Allah ke nazdeek hamaara amal qubool ho aur phir hamein us ka behtareen badla naseeb ho.

❧ Aqaaid mein Islaam ke paanch kalime, Imaan-e-Mujmal aur Imaan-e-Mufassal tarjame ke saath diye gaye hain aur Imaan-e-Mufassal mein zikr kiye gaye 7 bunyaadi aqaaid (Tauheed, Farishte, Aasmaani Kitaabein, Ambiya, Aakhirat, Taqdeer aur Ba'as Ba'adal Maut) ko mazmoon ki shakl mein diya gaya hai. Pehle donon kalime aur Imaan-e-Mujmal wa Mufassal tarjame ke saath yaad karaayein, baaqi kalimon ke tarjame achchhi tarah samjha kar zahen mein bithha dein. Padhaate waqt is baat ko bhi waazeh kiya jaaye ke in kalimon aur asbaaq mein maujood tamaam cheezon par dil se yaqeen rakhna zaroori hai.

            *✾ Kalima-e-Taiyyibah ​✾*

           لَآ اِلٰهَ اِلَّا اللّٰهُ مُحَمَّدٌ رَّسُوْلُ اللّٰهِ

❧ La ilaaha illallaahu Muhammadur rasoolullaah.

*❧ Tarjama :* Allah ke siwa koi ma'abood nahin, (Hazrat) Muhammad (ﷺ) Allah ke Rasool hain.

 [Tabraani Sageer : 992]

        ❅〰❅❅〰〰〰〰❅❅〰❅

       *✾ Kalima-e-Shahaadat ✾*

اَشْهَدُ اَنْ لَّآ اِلٰهَ اِلَّا اللہُ وَ اَشْهَدُ اَنَّ مُحَمَّدً اعَبْدُهٗ وَرَسُوْلُهٗ

❧ Ash-hadu allaa ilaaha illallaahu wa ashhadu anna Muhammadan ‘abduhoo wa rasooluh.

*❧ Tarjama :* Main gawaahi deta hoon ke Allah ke siwa koi ma'abood nahin aur main gawaahi deta hoon ke (Hazrat) Muhammad (ﷺ) Allah ke bande aur us ke Rasool hain.

 [Mustadrak : 9]

          ❅〰❅❅〰〰〰〰❅❅〰❅

        *✾ Kalima-e-Tamjeed ​✾*

سُبْحَانَ اللَّهِ وَالْحَمْدُ لِلَّهِ وَلاَ إِلَهَ إِلاَّ اللَّهُ وَاللَّهُ أَكْبَرُ وَلاَ حَوْلَ وَلاَقُوَّةَ إِلاَّ بِاللَّهِ ‏الْعَلِىّ الْعَظِيْم

❧ Subhaanallaahi walhamdu lillaahi walaa ilaaha illallaahu wallaahu akbar walaa haula walaa quwwata illaabillaahil aliyyil‘azeem

*❧ Tarjama :* Allah har aib se paak hai aur tamaam ta’areefein Allah ke liye hain aur Allah ke siwa koi ma'abood nahin aur Allah sab se bada hai, gunaahon se bachne ki taaqat aur nek kaam karne ki quwwat Allah hi ki taraf se hai, jo bahot buland azmat waala hai.

 [Abu Daawood : 832]

          ❅〰❅❅〰〰〰〰❅❅〰❅

        *✾ Kalima-e-Tauheed ✾*

لَآ إِِلٰهَ اِلَّا اللّٰهُ وَحْدَهُ لا شَرِيْكَ لَهْ، لَهُ الْمُلْكُ وَ لَهُ الْحَمْدُ يُحْى وَ يُمِيْتُ بِيَدِهِ الْخَيْرُ وَهُوَ عَلى كُلِّ شَيءٍ قَدِيْرٌ

❧  Laa ilaaha illallaahu wahdahoo laa shareeka lahoo, lahul mulku walahul hamdu yuhyee wayumeetu biyadihil khair wahuwa ‘alaa kulli shai-in qadeer.

*❧ Tarjama :* Allah ke siwa koi ma'abood nahin, woh akela hai, us ka koi shareek nahin, usi ke liye baadshaahat hai aur usi ke liye tamaam ta'areefein hain, wahi zinda karta hai aur wahi maut deta hai, usi ke qabze mein tamaam bhalaai hai aur woh har cheez par qaadir hai.

 [Musnad-e-Ahmad : 26551]

       ✮~~~~✮~~~~✮~~~~✮

        *✾ Kalima-e-Istigfaar ​✾*

اَللَّهُمَّ اِنّىْ أَعُوْدُ بِكَ أَنْ أُشْرِكَ بِكَ شَيئًا وََّ أَنَا أَعْلَمُهُ وَأَسْتَـغْفِرُكَ لِمَا لاأَعْـلَمُ

❧ Allaahumma innee a'oozubika an ushrika bika shaiaun wa-ana a'alamuhoo wa astagfiruka limaalaa a'alam.

*❧ Tarjama :* Aye Allah ! Main teri panaah chaahta hoon is baat se ke main tere saath kisi ko shareek karoon, is haal mein ke main us ko jaanta hoon aur aise gunaah se bhi maafi chaahta hoon jis ko main nahin jaanta.

 [Majma'uz Zawaaid : 17670]

         ❅〰❅❅〰〰〰〰❅❅〰❅

          *✾ Imaan-e-Mujmal ✾*

اَمَنْتُ بِاللهِ كَمَا هُوَ بِأَسْمَائِهِ وَصِفَاتِهِ وَقَبِلْتُ جَمِيْعَ أَحْكَامِهِ

❧  Aamantu billaahi kamaa huwa bi-asmaa-ihee wasifaatihee waqabiltu jamee-‘a ahkaamih.

*❧ Tarjama :* Main Imaan laaya Allah par jaisa ke woh apne naamon aur sifaton ke saath hai aur main ne us ke tamaam ahkaam qubool kiye.

       ✮~~~~✮~~~~✮~~~~✮
         

         *✾ Imaan-e-Mufassal ✾*

اَمَنْتُ بِاللهِ وَمَلَئِكَتِهِ وَكُتُبِهِ وَرُسُلِهِ وَالْيَوْمِ الْاَخِرِ وَالْقَدْرِ خَيْرِهِ وَشَرِّهِ مِنَ اللهِ تَعَالَى وَالْبَعْثِ بَعْدَالْمَوْتِ

❧ Aamantu billaahi wa malaaikatihee wa kutubihee wa rusulihee walyaumil aakhiri walqadri khairihee wa sharrihee minallaahi ta'aalaa walba'asi ba'adal maut.

*❧ Tarjama :* Main Imaan laaya Allah par aur us ke Farishton par aur us ki Kitaabon par aur us ke Rasoolon par aur Qayaamat ke din par aur is baat par ke achchhi aur buri taqdeer Allah Ta'ala ki taraf se hoti hai aur maut ke baad dobaara zinda kiye jaane par.

 
       ✮~~~~✮~~~~✮~~~~✮

          
                *✾  Tauheed  ✾*

❧ Allah ek hai, woh apni zaat wa sifaat mein akela hai, Allah Ta'ala ki zaat wa sifaat mein koi us ke maanind nahin, woh badi qudrat waala hai, har cheez us ki qudrat se qaaim hai, woh jis ko nafa aur faaida pohnchaane ka iraada kare, tamaam insaan aur jinnaat mil kar bhi us ko nuqsaan nahin pohncha sakte aur woh jis ko nuqsaan pohnchaane ka iraada kare, tamaam insaan aur jinnaat mil kar bhi us ko nafa nahin ponhcha sakte,

❧ Qur'aan mein hai: Aur agar tumhein Allah koi takleef ponhcha de to us ke siwa koi nahin jo use door kar de aur agar woh tumhein bhalaai ponhchaane ka iraada kar le to koi nahin hai jo us ke fazl ka rukh pher de.

 [Sura-e-Yunus: 107]

❧ Allah Ta'ala ko kisi saamaan aur madadgaar ki zaroorat nahin, sab us ke mohtaaj hain, woh kisi ka mohtaaj nahin, wahi haajaton ko poora karta hai, wahi duaaon ko sunta hai, wahi gunaahon ko maaf karta hai, sirf wahi zaat bandagi aur ibaadat ke laaiq hai aur sirf wahi zaat madad talab kiye jaane ke laaiq hai, woh badi shaan waala aur azmat waala hai. Garz tauheed ka matlab yeh hai ke Allah Ta'ala jis tarah apni zaat mein yakta hai usi tarah apni tamaam sifaat mein bhi yakta aur akela hai, us ki zaat wa sifaat mein koi us ka shareek nahin hai,

❧ Qur'aan mein hai : Koi cheez Allah Ta'ala ke maanind nahin hai.

       ✮~~~~✮~~~~✮~~~~✮

                *✾  Farishte  ✾*

❧ Farishte Allah Ta'ala ki nooraani makhlooq aur us ke muazzaz bande hain, woh gunaahon se paak hain, din raat Allah Ta'ala ki ibaadat mein mashgool rehte hain, jin kaamon par Allah Ta'ala ne un ko laga diya hai, un hi mein lage rehte hain, kabhi Allah Ta'ala ki naafarmaani nahin karte.

❧ Qur'aan mein hai: Farishte Allah ke kisi hukm mein us ki naafarmaani nahin karte aur wahi karte hain jis ka unhein hukm diya jaata hai.

 [Sura-e-Tahreem: 6]

❧ Farishte na mard hain na aurat, woh khaane peene ke mohtaaj nahin, un ki giza apne rab ki ibaadat wa bandagi karna aur us ke ahkaam ko baja laana hai, woh ibaadat se uklaate nahin hain, woh ibaadat se takabbur aur aar nahin karte, Allah Ta'ala ne un ko shaklein badalne ki taaqat de rakhi hai, kabhi woh insaan ki shakl mein haazir hote hain aur kabhi doosri shakl mein, aasmaanon aur zameenon ke saare intezaamaat Allah Ta'ala ne un ke supurd kiye hain. Farishte beshumaar hain, un ki tadaad Allah Ta'ala ke siwa koi nahin jaanta.

❧ Qur’aan mein hai: Aur tumhaare parwardigaar ke lashkaron (Farishton) ko us ke alaawa koi nahin jaanta.

 [Sura-e-Muddassir: 31]

 
❧ In mein 4 farishte bahot mash'hoor wa muqarrab hain:

1) Hazrat Jibraeel Alaihissalam.
2) Hazrat Meekaaeel Alaihissalam.
3) Hazrat Israafeel Alaihissalam.
4) Hazrat Izraaeel Alaihissalam.

 [Umdatul Qaari : 22/458]

*(1)* Hazrat Jibraeel Alaihissalam Allah Ta'ala ke ahkaam, kitaabein aur paigaamaat Rasoolon ke paas laate the.

[Sharahul Arbaeen Nawawiyyah: 6/3; Al Bidaaya Wannihaaya: 1/46]

*(2)* Hazrat Meekaaeel Alaihissalam Allah Ta'ala ki tamaam makhlooq ko rozi ponhchaane aur baarish wagaira ke intezaamaat par muqarrar hain, un ki maatahati mein beshumaar farishte kaam karte hain, baaz baadalon ke intezaam par muqarrar hain, baaz hawaaon, bijli aur kadak wagaira par aur baaz daryaaon, taalaabon aur nehron wagaira par muqarrar hain. Woh tamaam cheezon ka intezaam Allah Ta'ala ke hukm ke mutaabiq karte hain.

[Shua'bul Imaan: 158, Al Bidaaya Wannihaaya: 1/46]

*(3)* Hazrat Israafeel Alaihissalam Qayaamat ke din soor phoonkenge.

 [Shua‘bul Imaan: 353]

*(4)* Hazrat Izraaeel Alaihissalam makhlooq ki rooh qabz karne par muqarrar hain. Un ki maatahati mein beshumaar farishte hain, momin bandon ki jaan nikaalne waale farishte alag hote hain aur kaafir bandon ki jaan nikaalne waale farishte alag hote hain.

[Al Bidaaya Wannihaaya: 1/47]

 
❧ In 4 mash'hoor farishton ke alaawa aur farishton ka zikr bhi Qur'aan wa Hadees mein kiya gaya hai, jin mein se chand farishton ke kaam zikr kiye jaate hain:

*(1)* 4 farishte jin ko "Kiraaman Kaatibeen" kehte hain jin mein se 2 din mein aur 2 raat mein har ek bande ke saath hote hain, ek daayein kandhe par jo us ki neki likhta hai, doosra baayein kandhe par jo us ki buraai likhta hai.

[Sura-e-Infitaar: 11,12 ; Durre Mansoor: 8/440]

*(2)* Kuchh farishte aafaton aur balaaon se insaan ki hifaazat karne par muqarrar hain, jo aage peechhe se us ki hifaazat karte hain, jin ko "Hafazah" kaha jaata hai.

[Sura-e-An'aam: 61 ; Sura-e-Ra'ad: 11]

*(3)* Kuchh farishte insaan ke mar jaane ke baad qabr mein us se sawaal karne par muqarrar hain, jin ko "Munkar Nakeer" kehte hain.

 [Tirmizi : 1071]

❧ Allah Ta'ala ke tamaam farishton par Imaan laana zaroori hai. Jo un ka inkaar kare woh momin nahin ho sakta hai.

       ✮~~~~✮~~~~✮~~~~✮

             

       *✾ Aasmaani Kitaabein ✾*

❧ Allah Ta'ala ne bahot si chhoti badi kitaabein Hazrat Jibraeel Alaihissalam ke zariye bahot se paigambaron par utaareen, taake woh apni apni ummaton ko Deen ki baatein batlaaein, chhoti kitaabon ko "Saheefe" aur badi kitaabon ko "Kitaab" kehte hain. Allah Ta'ala ki bheji hui kitaabon mein se 4 kitaabein mash'hoor hain :

(1) Taurait
(2) Zaboor
(3) Injeel
(4) Qur'aan Majeed.

 [Sahi Ibne Hibbaan: 361]

*(1)* Taurait Hazrat Moosa Alaihissalam par naazil hui.

 [Sahih Muslim: 4536]

*(2)* Zaboor Hazrat Dawood Alaihissalam par naazil hui.

 [Sura-e-Nisa: 163]

*(3)* Injeel Hazrat Isa Alaihissalam par naazil hui.

 [Sura-e-Hadeed: 27]

*(4)* Qur'aan Majeed Hazrat Muhammad ﷺ par naazil huwa.

 [Sura-e-Dahar: 23]

❧ In 4 kitaabon ke alaawa kuchh saheefe Hazrat Shees Alaihissalam par, kuchh Hazrat Idrees Alaihissalam par, kuchh Hazrat Ibrahim Alaihissalam par, kuchh Hazrat Moosa Alaihissalam par aur kuchh doosre paigam-baron par naazil huwe.

 [Sahi Ibne Hibbaan: 361]

           ❅〰❅❅〰〰〰〰❅❅〰❅

       *✾ Aasmaani Kitaabein ✾*

*❧ Tamaam aasmaani kitaabon ke baare mein musalmaanon ka yeh Aqeeda hona chaahiye:*

*(1)* Tamaam aasmaani kitaabein insaanon ki rahnumaai ke liye naazil hui hain, un sab mein hidaayat ki baatein hain, waaz wa naseehat se bhare mazaameen hain, amr-o-nahi aur Jannat ke inaamaat aur Jahannam ki sazaaon par mushtamil baatein hain aur apne apne zamaane mein un ke ahkaamaat par amal karne mein bandon ki najaat hoti hai, Qur'aan Majeed ke naazil hone ke baad pichhli tamaam kitaabein aur shareeatein mansookh ho gaeen, ab Qayaamat tak sirf Qur'aan Majeed par hi amal karne mein bandon ki najaat hai.

[Sura-e-Maaida: 44,49; Muslim: 6378; Sharhul Aqaaidun Nasafiyyah: 142, 143 Meem]

*(2)* Pichhli aasmaani kitaabon mein se bahot si kitaabein to aaj maujood nahin hain aur jo kitaabein maujood hain, un mein se koi kitaab apne asli alfaaz aur maani ke saath mahfooz nahin hai, un mein Allah Ta'ala ke kalaam ke saath insaanon ka kalaam bhi shaamil ho gaya hai, gumraah logon ne un mein bahot si baatein apni taraf se mila di hain aur bahot saari baaton ko badal diya hai, is liye un pichhli kitaabon ki jo baatein Qur'aan ke muaafiq hain, woh to sachchi hain aur jo Qur’aan ke khilaaf hain woh jhooti hain aur jo baatein na muaafiq hain na mukhaalif hain un ke baare mein ham khaamosh rahenge, na un ko sachcha jaaneinge aur na
unhein jhutlaaeinge.

[Sura-e-Maaida: 13; Bukhaari: 4485]

*(3)* Allah Ta'ala ki naazil ki hui tamaam kitaabon aur saheefon ke baare mein yeh Imaan rakhna zaroori hai ke sab Allah Ta'ala ki taraf se naazil hui theen, jo bhi in kitaabon aur saheefon mein se kisi ka inkaar kare, to woh momin nahin hai.

 [Sura-e-baqarah: 4; Sura-e-Nisa: 136; Sharhul Aqeedatut Tahaawiyyah Libne Abil Iz: 1/297]

       ✮~~~~✮~~~~✮~~~~✮
      
         *✾  Nabi aur Rasool  ✾*

❧ Risaalat wa nubuwwat ke maana hain Allah Ta'ala ka paigaam logon tak ponhchaana. Allah Ta'ala logon tak apna paigaam ponhchaane ke liye apne khaas bandon ko duniya mein bhejte hain, us paigaam ko ponhchane waalon ko "Nabi aur Rasool" kehte hain.

❧ Nabiyon ka duniya mein tashreef laana duniya waalon ke liye rahmat aur bahot badi nemat hai, agar Allah Ta'ala nubuwwat wa risaalat ka silsila jaari na farmaata, to insaan na to apne paida karne waale ko pehchaan sakta, na use apni zindagi ke maqsad ka pata chalta, na use bhale bure ki tameez hoti aur na ek doosre ke huqooq ko pehchaan sakta. Allah Ta'ala ka bada ehsaan hai ke us ne nubuwwat wa risaalat ka silsila jaari kar ke duniya mein rehne ka sahi tareeqa bata diya.

[Sura-e-Aal-e-Imraan: 164; Sharhul Aqeedatut Tahaawiyyah Libne Abil Iz: 1/149]

       ✮~~~~✮~~~~✮~~~~✮

          *✾  Nabi aur Rasool  ✾*

*❧ Nabi aur Rasool ke baare mein zaroori aqeede :*

*(1)* Allah Ta'ala ne Nabi aur Rasool har mulk mein aur har qaum ki taraf bheje.

[Sura-e-Yunus: 47; Sura-e-Faatir: 24]

*(2)* Nabi aur Rasool sachche hote hain, kabhi jhoot nahin bolte, buri aadaton, bure kaamon aur chhote bade gunaahon se paak hote hain.

[Sharahul Aqaaidun Nasafiyya: 139 meem]

*(3)* Allah Ta'ala unhein apne bandon tak ahkaam pohnchaane ke liye muqarrar karta hai.

[Sura-e-A’araaf: 62; Sura-e-Ahzaab: 39]

*(4)* Woh Allah Ta'ala ke ahkaam bandon tak pohnchaane mein kotaahi aur kami ziyaadati nahin karte aur Allah Ta'ala ke ahkaam pohnchaane mein un se koi bhool aur galti nahin hoti hai.

[Sura-e-Yunus: 15; Sura-e-Najm: 2-4]

*(5)* Woh Allah Ta'ala ke ahkaam pohnchaane par bandon se koi muaawaza aur ujrat nahin lete.

[Sura-e-Saba: 47; Sura-e-Shu‘ara: 18]

*(6)* Jo un ke paigaam ko maanta hai, use sawaab aur Jannat ki khush khabri sunaate hain aur jo nahin maanta, use Allah Ta'ala ke azaab aur Dozakh se daraate hain.

[Sura-e-Saba : 28]

*(7)* Woh khud bhi achche kaam karte aur bure kaamon se bachte hain aur doosron ko bhi us ka hukm karte hain.

[Al Irshaad Ila Sahihul Eteqaad: 1/169]

*(8)* Allah Ta'ala unhein Moajaze ata karta hai.

[Sharahul Aqaaidun Nasafiyya: 134 meem]

*(9)* Allah unhein gaib ki bahot si baatein bataata hai.

[Sura-e-Aal-e-Imraan: 179; Sura-e-Jin: 26,27]

*(10)* Tamaam Nabi aur Rasool insaan the aur sab mard the koi aurat Nabi aur Rasool nahin hui.

[Sura-e-Yusuf: 109]

*(11)* Nubuwwat wa Risaalat Allah Ta'ala ka diya huwa atiya hai, us mein aadmi ki koshish, iraade aur ibaadat ko dakhal nahin, isi liye koi Wali chaahe apni mehnat se Allah ke yahaan kitna hi martaba haasil kar le, kabhi kisi Nabi ke darje ko nahin pohanch sakta.

[Safwatut Tafaaseer: 1/50; Sharahul Aqaaidun Nasafiyya: 164 meem]

       ✮~~~~✮~~~~✮~~~~✮
 

          *✾  Nabi aur Rasool  ✾*

❧ Nabiyon mein sab se pehle Hazrat Aadam Alaihissalam aur sab se aakhir mein hamaare Nabi Hazrat Muhammad ﷺ tashreef laaye. Chand mashhoor Nabiyon ke naam ye hain:
Hazrat Aadam Alaihissalam,
Hazrat Nooh Alaihissalam,
Hazrat Idrees Alaihissalam,
Hazrat Ibrahim Alaihissalam,
Hazrat Ismail Alaihissalam,
Hazrat Yaqoob Alaihissalam,
Hazrat Yusuf Alaihissalam,
Hazrat Moosa Alaihissalam,
Hazrat Dawood Alaihissalam,
Hazrat Sulaimaan Alaihissalam,
Hazrat Isa Alaihissalam aur
Hazrat Muhammad ﷺ.

[Sura-e-Ambiya: 48,85; Sharahul Aqaaidun Nasafiyya: 135 meem]

❧ Ambiyaa-e-Kiraam aur Rasoolon ki taadaad ke muta'alliq sahi aqeeda ye hai ke un ki koi khaas taadaad muqarrar na ki jaaye, balke ye aqeeda rakha jaaye ke duniya mein Allah Ta'ala ke bahot se Nabi aur Rasool aaye hain, sab apna apna tableeg ka fareeza ada kar ke chale gaye, sab par Imaan laana farz hai, un mein tafreeq karna yaani baaz ko maanna aur baaz ko na maanna kufr hai.

[Sura-e-Baqarah: 285; Sharahul Aqaaidun Nasafiyya: 138 meem]

      ✮~~~~✮~~~~✮~~~~✮

                *✾  Aakhirat  ✾*

❧ "Yaum-e-Aakhirat" ke maana baad mein aane waale din ke hain, duniya ki zindagi ke baad Aakhirat ki zindagi shuru hogi, jo kabhi khatm na hogi; us zindagi ko Islaami Shareeat mein "Aakhirat" kehte hain.

 [Tafseer Ibne Kaseer: 1/59]

❧ Duniya imtehaan ki jagah hai, duniya mein banda jo bhi achche ya bure aamaal karta hai, un ka Aakhirat mein use poora poora badla diya jaayega.

❧ Qur'aan mein hai: Chunaanche jis ne zarra baraabar koi achchaai ki hogi, woh use dekhega aurjis ne zarra baraabar koi buraai ki hogi, woh use dekhega.

 [Sura-e-Zilzaal: 7,8]

❧ Aakhirat par Imaan laana Imaan ka ek ahem juzw hai, Aakhirat par Imaan laane ka matlab ye hai ke is duniya ki zindagi ke baad ek aur zindagi hai, wahaan insaan ko is duniya mein kiye huwe bure aamaal ki saza aur bhale aamaal ki jaza milegi; Malakul Maut ka rooh qabz karna aur marne ke baad murde se Munkar Nakeer ka sawaal wa jawaab barhaq hai.

       ✮~~~~✮~~~~✮~~~~✮
   

                *✾  Aakhirat  ✾*

❧ Qayaamat ki alaamaton ka ek ek kar ke paaya jaana aur us ke baad Qayaamat ka aana yaqeeni hai. Tamaam murdon ka dobaara zinda ho kar Maidaan-e-Hashr mein jama hona, hisaab wa kitaab hona, meezaan ka qaaim hona aur aamaal naamon ka wazan kiya jaana bilkul sach hai. Pul Siraat se guzarna, us ka baal se ziyaada baareek aur talwaar se ziyaada tez hona, Imaan waalon ka us par tezi se guzar jaana aur kaafiron ka Jahannam mein gir jaana haqeeqat hai. Jannat aur us mein tarah tarah ki nematein aur Dozakh aur us mein hone waali takleefein barhaq hain.

[Sharahul Aqeedatit Tahawiyya Li Saaleh bin Abdul Azeez: 1/429; Attauheed Linnnaashiati wal mubtadieen Li Abdil Azeez bin Muhammad: 1/68]

❧ Aakhirat ke baare mein Qur'aan wa Hadees mein jin jin baaton ko zikr kiya gaya hai un tamaam par Imaan laana aur un ke muta’alliq bataai hui baaton ko sachcha jaanna zaroori hai.

 
       ✮~~~~✮~~~~✮~~~~✮
  
                *✾  Taqdeer  ✾*

❧ Saare aalam mein jo kuchh huwa, hota hai aur aainda hoga, tamaam cheezon ke baare mein Allah Ta'ala ko pehle se ilm hai. Allah Ta'ala ke isi ilm ko "Taqdeer" kehte hain.

[Sharahul Aqeedatit Tahawiyya Libne Abil Iz: 1/272]

*❧ Taqdeer ke baare mein chand zaroori Aqaaid:*

*(1)* Duniya mein jo kuchh bhi huwa ya hota hai ya hoga, un sab cheezon ko Allah Ta’ala ne duniya banaane se pehle hi Lauh-e-Mahfooz mein likh diya tha.

[Sahih Muslim: 6919]

*(2)* Jin cheezon ka hona muqaddar hai unhein koi rok nahin sakta.

[Abu Daawood: 4700]

*(3)* Achche bure haalaat sab Allah Ta'ala hi ki taraf se hain.

[Sura-e-Nisa: 78]

*(4)* Agar achche haalaat pesh aayein to fakhr wa guroor na kare balke Allah Ta'ala ka shukr ada karein. Agar bure haalaat pesh aayein to use apne bure aamaal ka nateeja samajh kar tauba wa istigfaar kare aur yeh soche ke is mein Khuda ki koi hikmat wa maslehat hogi.

[Sahih Muslim: 7692; Shoabul Imaan: 1/201]

*(5)* Agar kisi ko koi museebat pesh aaye to yeh hargiz na kahe ke agar main aise karta to aisa hota balke ye kahe ke mere muqaddar mein yahi tha.

 [Sahih Muslim: 6945]

*(6)* Taqdeer par bharosa kar ke hargiz na baithhna chaahiye yaani yeh hargiz na soche ke Allah Ta'ala ne har cheez pehle se likh rakhi hai, lihaaza ab amal kar ke kuchh faaida nahin balke zaroori tadbeerein ikhtiyaar karna chaahiye, is liye ke nek logon ke liye neki ke raaste khol diye jaate hain aur un raaston par chalna un ke liye aasaan hota hai aur badbakht logon ke liye buraai ke raaste khol diye jaate hain aur un raaston par chalna un ke liye aasaan hota hai.

 [Sahih Bukhaari: 4949]

*(7)* Pehli ummatein taqdeer ke baare mein bahes wa hujjat karne ke wajah se halaak hui hain, is liye hamein yeh ta'aleem di gai hai ke ham taqdeer ke baare mein bahes wa hujjat na karein.

 [Tirmizi: 2133]

       ✮~~~~✮~~~~✮~~~~✮

*✾ Marne ke baad dobaara zinda hona ✾*

​❧ Ba'as Ba'adal Maut ke maana hain marne ke baad dobaara zinda kar ke uthhaaya jaana. Qayaamat ke din Hazrat Israafeel Alaihissalam jab pehli martaba soor phoonkeinge to tamaam jaandaar mar jaayeinge aur phir Hazrat Israafeel Alaihissalam ko bhi Allah Ta'ala maut de denge, ek muddat ke baad Allah Ta'ala Hazrat Israafeel Alaihissalam ko zinda karenge, phir woh dobaara soor phoonkeinge, jis se tamaam log dobaara zinda ho jaayenge, isi ko "Ba'as Ba'adal Maut" kehte hain.

[Sharahul Aqeedatit Tahaawiyya Li Saaleh bin Abdil Azeez: 1/534]

​❧ Sab se pehle hamaare Nabi ﷺ qabr-e-mubaarak se is tarah baahar tashreef laayeinge ke Aap ﷺ ke daahine haath mein Hazrat Abu Bakr Siddiq RaziyAllahu Anhu ka haath hoga aur baayein haath mein Hazrat Umar RaziyAllahu Anhu ka haath hoga.

[Ibne Maaja: 4308; Tirmizi: 3669]

​❧ Phir Hazrat Isa Alaihissalam aur doosre Ambiya Alaihissalam uthhenge phir Siddiqeen, Shuhada, Saaliheen aur Momineen yeh kehte huwe uthhenge:

*“Alhamdu lillaahillazee azhaba annal hazn, inna rabbanaa lagafoorun shakoor”*

*​❧ Tarjama:* Allah ka shukr hai jis ne ham se gam ko door kar diya, beshak hamaara parwardigaar bahot bakhshne waala, bada qadardaan hai.

[Shoabul Imaan: 100]

​❧ Akheer mein kuffaar aur bure log yeh kehte huwe uthhenge:

*“Yaa wailanaa mam ba’asanaa mim marqadinaa”*

*​❧ Tarjama:* Haaye hamaari kharaabi! Kis ne ham ko hamaari qabron se uthha diya.

[Shoabul Imaan: 357]

❧ Jo shakhs jis haal mein mara hai usi haal mein uthhega, shaheedon ke zakhmon se khoon beh raha hoga, jis ki rangat aur khushbu zaafraan ki tarah hogi, jo Haj mein mara hoga woh *“Labbaik ...... ”* kehta huwa uthhega, har shakhs barhana (nanga) aur gair makhtoon (bagair khatna kiye huwe) uthhega, sab se pehle Hazrat Ibrahim Alaihissalam ko safed Hulla (libaas) pehnaaya jaayega, un ke baad Hazrat Muhammad ﷺ ko kapde pehnaaye jaayenge (un ke baad aur Rasoolon aur Nabiyon ko, un ke baad doosre logon ko kapde pehnaaye jaayenge.)

[Muslim: 7413, Bukhaari: 237, Bukhaari: 1851, Bukhaari: 3349, Musnad-e-Ahmad: 3787]

       ✮~~~~✮~~~~✮~~~~✮
  ❅

*​✾ Marne ke baad dobaara zinda hona​*

​❧ Ham musalmaanon ka aqeeda hai ke marne ke baad dobaara zinda uthhaaya jaana haq hai aur Allah Ta'ala marne ke baad dobaara zinda karne par Qaadir hai, Qayaamat ke din Allah Ta'ala jism ki boseeda haddiyon aur mitti mein mile huwe rezon ko har jagah se jama karega, chaahe woh aag mein jala ho ya paani mein dooba ho ya jaanwar ke pet mein hazm ho gaya ho, jism ke tamaam ajza ko jama karega aur jo roohein duniya mein jismon ke andar theen, un ko jismon mein daal kar dobaara zinda karega.

*​❧ Qur‘aan mein hai :* Aur Kuffaar-e-Makkah kaha karte the ke jab ham mar jaayenge aur mitti aur haddiyaan ban kar reh jaayenge to kya hamein dobaara zinda kiya jaayega? Aur kya hamaare pehle guzre huwe baap daadon ko bhi? Keh do ke yaqeenan sab agle aur pichhle log ek muta'ayyan din ke taye shuda waqt par zaroor ikatthhe kiye jaayenge.

[Sura-e-Waaqiah: 47-50]

​❧ Marne ke baad dobaara zinda hona haq hai, jo shakhs bhi marne ke baad dobaara zinda hone ka inkaar kare ya us mein shak kare, to woh momin nahin hai.

 
       ✮~~~~✮~~~~✮~~~~✮
      

*​✾ ​Hazrat Muhammad ﷺ aakhri Nabi*

​❧ Sab se aakhri Nabi Hazrat Muhammad ﷺ hain. Aap ﷺ ke baad qayaamat tak koi Nabi nahin aayega, Aap ﷺ ne khud farmaaya: *“Anaa khaatamun nabiyeena laa nabiyya ba’adee"*

*​❧ Tarjama:* Main aakhri Nabi hoon, mere baad koi Nabi nahin aayega.

[Abu Daawood: 4252]

❧ Lihaaza jo shakhs bhi Aap ﷺ ke baad apne Nabi hone ka daawa kare woh jhoota hai aur jo us ko Nabi maane woh kaafir hai. Huzoor ﷺ ke zamaane se le kar is waqt tak bahot se logon ne apne Nabi hone ka daawa kiya, woh sab ke sab jhoote the, Hazrat Isa Alaihissalam qayaamat ke qareeb aasmaan se utreinge, lekin woh bhi hamaare Nabi Hazrat Muhammad ﷺ ki shari‘at par amal kareinge aur apne nubuwwat ke mansab par qaaim rehte huwe Huzoor ﷺ ki ta‘aleemaat ke mutaabiq is ummat ki islaah farmaayeinge.

[Bukhaari: 7121, Tafseer Ibne Kaseer: 3/527; Sharhul Aqaaidin Nasafiyyah: 137, 138 Meem]

❧ Aap ﷺ ke baad kisi Nabi ke aane ki zaroorat nahin rahi, is liye ke Allah Ta'ala ne Aap ﷺ ke zariye Deen ko har tareeqe se kaamil wa mukammal kar diya.

*❧ Qur'aan mein hai :* Aaj main ne tumhaare liye tumhaare Deen ko mukammal kar diya. Tum par apni nemat poori kardi, aur tumhaare liye Islaam ko Deen ke taur par (Hamesha ke liye) pasand kar liya.

[Sura-e-Maaidah: 3]

       ✮~~~~✮~~~~✮~~~~✮
    
*​✾ ​Sahaaba RaziyAllahu Anhuma*

​❧ “Sahaaba’’ sahaabi ki jama hai, jis shakhs ne imaan ki haalat mein Huzoor ﷺ se mulaaqaat ki ho aur imaan hi ki haalat mein us ki wafaat hui ho, us ko “Sahaaba’’ kehte hain.

[Umdatul Qaari: 24/229]

​❧ Sahaaba RaziyAllahu Anhuma bahot saare hain, un ke martabe aapas mein kam ziyaada hain, lekin tamaam insaanon mein ambiya Alaihissalam ke baad Huzoor ﷺ ke sahaaba ka martaba hai, tamaam Sahaaba-e-Kiraam RaziyAllahu Anhuma kaamil imaan waale, muttaqi, parhezgaar aur a'ala darje ke wali the. Tamaam sahaaba mein 4 Hazraat sab se afzal hain, pehle Hazrat Abu Bakr RaziyAllahu Anhu phir Hazrat Umar Faarooq RaziyAllahu Anhu phir Hazrat Usmaan RaziyAllahu Anhu phir Hazrat Ali RaziyAllahu Anhu.

​❧ Hamaare Nabi ﷺ ki shareeat ka ilm hamein Sahaaba-e-Kiraam RaziyAllahu Anhuma ke zariye se haasil huwa, agar darmiyaan mein Sahaaba-e-Kiraam RaziyAllahu Anhuma ka waasta na hota, to ham ko na Qur'aane Kareem ka ilm hota aur na Aap ﷺ ki Hadees ka ilm hota, Allah Ta'ala ne sahaaba RaziyAllahu Anhuma ke liye apni raza wa khushnoodi ka elaan farmaaya hai.

*​❧ Qur'aan mein hai :* Allah in hi se raazi ho gaya aur woh Allah se raazi ho gaye.

[Sura-e-Baiyyinah: 8]

​❧ Kisi bhi sahaabi ko bura bhala kehna jaaiz nahin, jo sahaaba par tanqeed kare aur un ki shaan mein gustaakhi kare woh bada gunahgaar aur faasiq hai.

[Musannaf Abdur  Razzaaq: 20710; Sharhul Aqaaidin Nasafiyyah: 161-163 Meem]

       ✮~~~~✮~~~~✮~~~~✮
  

                 *​✾ ​Mo’ajizah ✾*

​❧ Allah Ta'ala apne paigambaron se kabhi aadat ke khilaaf aisi baatein zaahir kara deta hai, jin par Allah Ta'ala ke siwa kisi ko qudrat nahin hoti, doosre log is ke karne se aajiz hote hain, aisi baaton ko "Mo’ajizah" kehte hain.

[Sharhul Aqaaidin Nasafiyyah: 134 Meem]

​❧ Paigambaron se aadat ke khilaaf aisi baatein zaahir karaane ka maqsad logon ko samjhaana hota hai ke yeh Allah Ta'ala ke bheje huwe paigambar aur us ke makhsoos bande hain, paigambaron ke mo’ajizaat haq hain, un par imaan lana zaroori hai. Allah Ta'ala ne bahot se paigambaron ko un ki risaalat ki taaeed ke liye mukhtalif qism ke mo'ajize ata farmaaye,

​❧ Hazrat Moosa Alaihissalam ke asa (laathhi) ka saanp ban jaana,

​❧ Hazrat Isa Alaihissalam ka Allah Ta'ala ke hukm se murdon ko zinda karna,

​❧ Hazrat Daawood Alaihissalam ke haath mein lohe ka narm hojaana.

       ✮~~~~✮~~~~✮~~~~✮
   

                 *​✾ ​Mo’ajizah ✾*

​❧ Huzoor ﷺ ko bhi beshumaar mo'ajizaat ata kiye gaye, jin mein se do mo’ajize maaroof wa mash-hoor hain:

*(1) Meraaj :* Allah Ta'ala ke hukm se Huzoor ﷺ raat ko bedaari ki haalat mein Hazrat Jibraeel Alaihissalam ke saath Makkah Muazzamah se Baitul Muqaddas gaye aur phir wahaan se saaton aasmaanon par aur jahaan tak Allah Ta’ala ko manzoor tha wahaan tak tashreef le gaye, usi raat mein Jannat aur Dozakh ki sair ki aur phir apne maqaam par waapas aagaye, isi ko “Me'araaj” kehte hain.

[Sharhul Aqeedatit Tahaawiyah Ibne Abil Iz: 1/223; Sahih Muslim: 429]

*(2) Shaqqe Qamar :* Ek raat kuffaare Makkah ne Huzoor Akram ﷺ se kaha ke hamein koi Mo’ajizah dikhaaiye to Huzoor ﷺ ne ungli se chaand ki taraf ishaara kiya, jis se chaand ke 2 tukde ho gaye, sab haazireen ne 2 tukde dekh liye, phir woh donon tukde aapas mein mil gaye aur chaand jaisa tha waisa hi hogaya, isi ko “Shaqqe Qaamar” ka Mo'ajizah kehte hain.

[Sahih Bukhaari: 3868]

       ✮~~~~✮~~~~✮~~~~✮
 

                *​✾ ​Karaamat ✾*

​❧ Allah Ta’ala apne nek bandon ki izzat badhaane ke liye kabhi kabhi un ke zariye aisi baatein zaahir karaadeta hai jo aadat ke khilaaf aur mushkil hoti hain, jinhein aam log nahin kar sakte, jaise paani par chalna, hawa mein udna wagaira in baaton ko “Karaamat” kehte hain.

[Sharhul Aqeedatit Tahaawiyah Li Saaleh Bin Abdil Azeez: 1/670]

*​❧ Karaamat ke baare mein chand zaroori aqaaid:*

*(1)* Nek bandon aur Auliya Allah se karaamaton ka zaahir hona haq hai.

[Sharhul Aqeedatut Tahaawiyah Abdullah: 92/1]

*(2)* Wali se karaamat ka zahoor Allah ke ahkaam ki mukammal paabandi aur Huzoor ﷺ ki kaamil ittiba aur pairwi ki barkat se hota hai.

[Sharhul Aqeedatit Tahaawiyah Li Saaleh Bin Abdil Azeez: 1/673]

*(3)* Wali chaahe khuda ka kitna hi pyaara ho jaaye magar jab tak hosh-o-hawaas baaqi ho, woh shareeat ka paaband hai, namaaz, rozah aur koi ibaadat us se maaf nahin ho jaati aur gunah ki baatein us ke liye durust nahin hoteen.

[Sharhul Aqeedatit Tahaawiyah Li Abdullah: 49/10]

*(4)* Aisa shakhs jo shareeat ke khilaaf kaam kare jaise namaaz na padhe ya daadhi mundaaye wagaira woh hargiz wali nahin ho sakta, chaahe us se kitni hi baatein aadat ke khilaaf zaahir hoti hon, chaahe woh hawa mein udne lage, paani par chalne lage aur tarah tarah ke ajeeb kaam kare, aadat ke khilaaf aisi baatein ya to jaadu hai ya shaitaani harkatein.

[Sharhul Aqeedatit Tahaawiyah Li Saaleh Bin Abdil Azeez: 1/673]

❧ Ham musalmaanon ka aqeeda hai ke Auliya Allah se karaamaton ka zaahir hona haq hai aur us par hamaara imaan hai.

       ✮~~~~✮~~~~✮~~~~✮
    

             *​✾ ​Kufr wa Shirk ✾*

*​❧ Kufr :* Kufr ke maani hai na maanna, Islaam mein jin cheezon par imaan laana zaroori hai, in mein se kisi ek ko bhi na maanna “Kufr” hai.

[Sharhul Aqeedatit Tahaawiyah Li Abdullah Bin Abdir Rahman; 38/16]

❧ Jaise koi shakhs Allah Ta‘ala ki zaat ko na maane ya us ki sifaat mein se kisi sifat ka inkaar kare, ya farishton ka inkaar kare ya pichhle ambiya Alaihissalam par naazil hone waali kitaabon ke baare mein yeh aqeeda rakhe ke woh Allah Ta'ala ki kitaabein nahin theen ya Qur’aan Majeed ke kisi mazmoon ka inkaar kare ya kisi Nabi ko na maane ya paigambaron ko jhoota kahe aur un ki taraf buri baaton ko mansoob kare ya taqdeer ka inkaar kare ya aakhirat ke din, qayaamat aur Hashr-o-Nashr ka inkaar kare maslan yoon kahe ke marne ke baad dobaara zinda nahin kiya jaayega ya Allah Ta’ala ko aasmaan wa zameen ke fana karne ki qudrat nahin hai ya hisaab na hoga ya Jannat wa Jahannam ka zikr sirf logon ko khush karne aur daraane ke liye kiya gaya hai, warna haqeeqat kuchh nahin hai ya Qur'aane Kareem ke qat’ee ahkaam mein se kisi hukm ka inkaar kare maslan namaaz, rozah ya zakaat wagaira ka inkaar kare ya Rasoolullah ﷺ ki bataai hui kisi baat ko jhutlaaye, to tamaam soorton mein woh kaafir ho jaayega.

   ✍ Ref: Deeniyat Course book

     ❅〰❅❅〰〰〰〰❅❅〰❅

*✧ _ Shirk _,* _ Shirk ke ma'ani hai Shareek Karna ,Allah ki zaat mai Kisi doosre ko Shareek Karna " Shirk " hai ,

*✧ _ Allah Ki Zaat mai Shirk :-* _ Allah Ta'ala ki zaat mai shirk Ka Matlab ye hai k Allah Ta'ala ke alawa kisi aur ko bhi Khuda maanna , Jese Iysa'i Allah Ta'ala ko Khuda maanne ke Saath Saath Hazrat Iysa Alaihissalam ko Khuda Ka Beta aur Hazrat Mariyam ko Khuda ki Bivi maante hai'n, to Wo teen khuda maanne ki vajah se Mushrik hue ,

✧ _ Aatish Parast ( Aag ki Pooja karne wale ) Do Khuda maante hai'n :- ek bhalai Ka Paida karne Wala aur Doosra Buraa'i Ka Paida karne Wala,Jiski vajah se Wo Mushrik hue , Aur But Parast Chaand ,Suraj ,Aag ,Paani ,Darakht ,Patthar jesi Bahut si cheezo ko Khuda maan Kar Mushrik hue ,

*Ref:- Deeniyat Course Book,*

      ✮~~~~✮~~~~✮~~~~✮

             *​✾ ​Kufr wa Shirk ✾*

*​❧ Allah Ta’ala ki sifaat mein shirk:*

❧ Allah Ta'ala ki sifaat mein shirk ka matlab yeh hai ke jo sifaat Allah Ta'ala ke saath khaas hain, un ko kisi doosre ke liye maanna jaise Allah Ta'ala ke alaawa kisi ko rozi dene waala aur aulaad dene waala samajhna, kisi Nabi aur wali ke baare mein yeh aqeeda rakhna ke un ko khuda ki tarah gaib ki tamaam baaton ka ilm hai, Allah Ta'ala ki tarah kisi doosre ko ibaadat ka mustahiq samajhna aur us ke liye ibaadat ka koi fel karna jaise kisi qabr par ya kisi buzurg ke saamne sajda karna, kisi paigambar aur wali ke naam ka roza rakhna aur un ke naam par jaanwar zabah karna wagaira wagaira.

❧ Gunaahon mein kufr-o-shirk sab se bade gunah hain, kufr-o-shirk toba ke bagair hargiz maaf nahin hote, kufr-o-shirk ki haalat mein marne waala hamesha Jahannam mein rahega.

❧ Qur‘aan Majeed mein Allah Ta'ala ne shirk ke baare mein farmaaya: “Beshak Allah Ta'ala shirk ko maaf nahin karega aur is ke alaawa jis gunah ko jis ke liye chaahega maaf kardega.”

 [Sura-e-Nisa: 116]

❧ Aur kufr ke baare mein farmaaya: “Jin logon ne kufr kiya aur hamaari aayaton ko jhutlaaya, wahi log Jahannam waale hain, woh us mein hamesha hamesha raheinge.”

 [Sura-e-Baqrah: 39]

*​✾ ​Kuffaar ke Mazhabi tehwaaron mein shirkat*

❧ Kuffaar ke mazhabi tehwaar mushrikaana aqeedon se bhare hote hain jaise Ganesh Chaturthi, Dasehra, Murti Pooja, Holi, Diwali aur Christmas wagaira in mein shirkat karna haraam hai, kuffaar ke mazhabi tehwaaron mein shareek hone ki chand soortein yeh hain:

(1) In tehwaaron ka manaana.
(2) Tehwaar manaane mein un ke saath shareek hona.
(3) Mazhabi tehwaaron mein un ki madad karna.
(4) Mazhabi tehwaaron mein tohfa ya Chanda wagaira dena.
(5) Mazhabi tehwaaron ki khushi mein apne ghar ke liye cheezein khareedna aur khaane pakaane ka ehtemaam karna.
(6) Mazhabi juloos mein shareek hona.

❧ Agar koi musalmaan in mein se kisi bhi baat ko achchha jaan kar karega, to us ka imaan jaata rahega aur agar gunah jaan kar karega, to sakht gunahgaar hoga.

❧ Ham tamaam musalmaan kuffaar ke mazhabi tehwaaron ko na manaate hain aur na un mein shareek hote hain.

[Sunane Kubra Baihaqi: 19333 ; Al-Bahrur Raaiq: 5/133 ; Al-Irshaad Ila Saheehil Eteqaad: 1/290]

       ✮~~~~✮~~~~✮~~~~✮
          

      *​✾ ​Alaamaate Qayaamat ✾*

❧  Qayaamat kab qaaim hogi? Is ka ilm Allah Ta'ala ke alaawa kisi ko nahin hai, albatta Allah Ta'ala ne Huzoor ﷺ ko wahi ke zariye qayaamat ki bahot si alaamatein batlaai hain, jo qayaamat qaaim hone se pehle duniya mein paai jaaein gi.

[Ashraatus Saa'ah Li Abdillah Bin Sulaimaan: 1/43-45]

❧ Qayaamat ki alaamatein 2 tarah ki hain:

*(1)* Alaamaate Sugra (Chhoti Alaamaatein)

*(2)* Alaamaate Kubra (Badi Alaamaatein)

[Sharhul Aqeedatit Tahaawiyah Li Saaleh Bin Abdil Azeez: 1/691; Ashraatus Saa'ah Li Abdillah Bin Sulaimaan: 1/48]

*
       ✮~~~~✮~~~~✮~~~~✮

          *​✾ ​Alaamaate Sugra ✾*

❧ Huzoor ﷺ ki paidaaish se lekar Hazrat Mehdi RaziyAllahu anhu ke zaahir hone tak jo bhi alaamatein aur nishaaniyaan zaahir hongi, un ko “Alaamaate Sugra” kehte hain.

[Ashraatus Saa'ah Li Abdillah Bin Sulaimaan: 1/49; Al Imaan Haqeeqatuhu, Khawaarimuhu, Nawaaqizuhu Inda Ahlis Sunnati Wal Jama'ah: 1/83]

*❧ Alaamaate Sugra yeh hain:*

(1) Ilm ka uthh jaana aur jihaalat ka badh jaana.

(2) Zina kaari, sharaab khori aur qatl wa gaaratgiri ka aam hona.

(3) Aurton ka ziyaada hona aur mardon ka kam hona.

(4) Zalzalon ka aana.

(5) Logan ka oonchi oonchi imaaratein banaana.

(6) Amal mein kotaahi aur dil mein laalach ka badh jaana.

(7) Gaane bajaane ke saamaan aur gaane waali aurton ka aam hojaana.

(8) Maan ki naafarmaani karna aur biwi ki ita'at karna.

(9) Doston ko qareeb bithhaana aur baap ko door karna.

(10) Bad akhlaaq, Harees aur na ahel logon ko bade bade ohde milna aur khauf ki wajah se aise logo ki taazeem kiya jaana.

(11) Ummat ke pichhle logon ka aglon par la'an ta'an karna.

(12) Zakaat ko taawaan (bojh) samajhna.

(13) Masjidon mein duniya ki baaton ka shor hona.

[Bukhaari: 5231; Bukhaari: 7121; Tirmizi: 2210]

(14) Sachche aadmi ko jhoota aur jhoote ko sachcha samajha jaana.

(15) Sharm wa haya aur dilon se amaanat wa dayaanat ka uthh jaana.

(16) Zulm wa rishwat ka badh jaana.

(17) Deen ka ilm duniya haasil karne ki niyyat se seekhna.

(18) Kaafiron ka chaaron taraf se musalmaanon par hamla karna.

(19) Darindon ka aadmiyon se baat karna.

(20) Waqt mein barkat na hona, yahaan tak ke saal ka maheene ki tarah aur maheene ka hafte ki tarah aur hafte ka din ki tarah aur din ka ghante ki tarah guzar jaana.

[Ibne Maaja: 4036 ; Sho'abul Imaan: 5276 ; Sunanul Waaridati Fi Li Fitni: 428 ; Tirmizi: 2211 ; Abu Daawood: 4297 ; Musnade Ahmad: 11792 ; Tirmizi : 2332]

❧ Mazkoora alaamaton ke alaawa aur alaamatein bhi hain jo is tarah pai dar pai zaahir hongi jaise jaise tasbeeh ka dora toot kar us ke daane yake baad deegre girne lagte hain, in saari alaamaton ka zaahir hona haq aur yaqeeni hai.

 
       ✮~~~~✮~~~~✮~~~~✮

          *​✾ ​Alaamaate Kubra ✾*

❧ Hazrat Mehdi RaziyAllahu anhu ke zaahir hone ke baad se soor phoonke jaane tak jo bhi alaamatein zaahir hongi, un ko “Alaamaate Kubra” kehte hain.

*❧ Alaamaate Kubra kul 10 hain:*

(1) Hazrat Mehdi RaziyAllahu anhu ka zaahir hona.

(2) Dajjaal ka nikalna.

(3) Hazrat Isa Alaihassalam ka aasmaan se utarna.

(4) Yaajooj Maajooj ka nikalna.

(5) Khasaf yaani zameen mein dhans jaane ke 3 waaqiaat honge, ek mashriq mein, ek magrib mein aur ek Jazeeratul Arab.

(6) Dhuwein ka zaahir hona.

(7) Sooraj ka magrib se nikalna.

(8) Daabbatul Arz yaani ek ajeeb jaanwar ka zameen se nikalna.

(9) Yaman se aag ka nikalna.

(10) Ek khusgawaar hawa ka chalna jis se tamaam momineen ki rooh qabz ho jaayegi. In tamaam alaamaton ke paaye jaane ke baad qayaamat achaanak aajaayegi.

[Muslim: 7468 ; Ashraatus Saa‘ah Li Abdillah Bin Sulaimaan: 1/91 ; Al Imaan Haqeeqatuhu, Khawaarimuhu, Nawaaqizuhu Inda Ahlis Sunnati Wal Jama'ah: 1/83,84]

       ✮~~~~✮~~~~✮~~~~✮

                  *​✾  ​Barzakh  ✾*

❧ Allah Ta'ala ne duniya aur aakhirat ke darmiyaan ek aur jahaan aur aalam basaaya hai, jo marne ke baad se qayaamat qaaim hone tak rahega, us jahaan ko “Barzakh” kehte hain aur us ko “Aalame Qabr” kehte hain, Qabr se yahi aalam muraad hota hai.

[Sharhul Aqeedatit Tahaawiyah Li Saaleh Bin Abdil Azeez: 1/523]

❧ Insaan jab mar jaata hai, agar dafan kiya jaaye, to dafan hone ke baad, warna jis haal mein ho, us ke paas 2 nihaayat haibatnaak farishte aate hain, jin ka rang siyaah aur aankhein neeli hoti hain, jin mein se ek ko “Munkar” aur doosre ko “Nakeer” kehte hain.

[Tirmizi: 1071]

❧ “Munkar wa Nakeer” murde se sawaal karte hain ke tera Rab kaun hai? Tera Deen kya hai? Hazrat Muhammad ﷺ ke baare mein poochhte hain ke yeh shakhs kaun hain? Agar murda imaan waala ho, to thheek jawaab deta hai “Mera Rab Allah hai, Mera Deen islaam hai aur Hazrat Muhammad ﷺ Allah ke Rasool hain”.

❧ Theek jawaab dene ke baad pehle us ke saamne dozakh ka manzar pesh kiya jaata hai aur kaha jaata hai ke tumhaara thhikaana yahaan hota magar Allah ne tum ko is se bachaaliya, phir use Jannat ka nazaara karaaya jaata hai, us ke liye jannat ke bichhawne bichhaaye jaate hain, us ko Jannat ke kapde pehnaaye jaate hain, Jannat ka darwaaza khol diya jaata hai, us ki qabr kushaada kardi jaati hai aur khoobsoorat chehre, behtareen libaas aur umdah khushbooh mein us ka nek amal us ke saamne haazir hota hai, is ke baad woh (khushi mein) kehta hai: Aye Rab! Qayaamat qaaim farma, aye Rab! Qayaamat qaaim farma; Taake main apne ahl-o-ayaal aur maal (Jannat ki hooron aur us ki nematon) mein pahonch jaaoon.

❧ Aur agar murda imaan waala nahin hai, to Munkar Nakeer ke tamaam sawaalon ke jawaab mein cheekhta chillaata huwa yahi kehta hai ke mujhe kuchh khabar nahin, is naakaami ke baad pehle us ko Jannat ka manzar dikhaaya jaata hai aur kaha jaata hai ke agar tum imaan laate aur nek aamaal karte, to tumhaara thhikaana yahaan hota, phir us par Allah Ta’ala ka azaab musallat ho jaata hai, us ke neeche aag bichhaadi jaati hai, us ke liye dozakh ka darwaaza khol diya jaata hai, farishte lohe ke hathodon se us ko aisa maarte hain ke jinnaat aur insaan ke alaawa sab us ki aawaaz sunte hain, qabr us ko is qadr bheenchti hai ke us ki pasliyaan ek doosre mein ghus jaati hain, is ke baad badsoorat, kharaab kapde aur badbu mein us ka amal zaahir hota hai, to woh kehta hai ke aye Rab! Qayaamat qaaim na farma.

[Musnade Ahmad: 18534 ; Musnade Ahmad: 14722 ; Musnade Ahmad: 12271]

❧ Aalame Barzakh mein nek aur momin bandon par Allah Ta'ala ki rehmatein aur us ka inaam hota hai aur kaafiron aur naafarmaan mominon par Allah Ta'ala ka azaab hota hai. Allah Ta’ala ke is inaam ya azaab ka taalluq murde ke jism aur rooh donon se hota hai, chaahe marne waale ka jism mitti mein khaak ho gaya ho ya aag mein jal gaya ho ya paani mein doob gaya ho ya darindon, parindon aur machhliyon wagaira ne kha kar hazam kar diya ho.

[Sharhul Aqeedatit Tahaawiyah Ibne Abil Iz: 1/396]

❧ Murde ke jism aur rooh se Allah Ta’ala ke inaam ya azaab ki kaifiyat wa haalat ka sahi ilm Allah Ta'ala hi ko hai, hamaari samajh mein aaye ya na aaye ham ko is par imaan laana zaroori hai.

❧ Murde ke saamne qayaamat tak rozaana subah wa shaam us ka thhikaana (Jannat ya dozakh) pesh kiya jaata hai, Jannati ko Jannat dikha kar khush khabri di jaati hai aur dozakhi ko dozakh dikha kar us ke khauf ko badhaaya jaata hai.

❧ Ham musalmaanon ka aqeda hai ke barzakh haq hai, har imaan waale ko is par imaan laana zaroori hai.

[Sahih Bukhaari: 1379]

❧ Aalame Barzakh mein nek aur momin bandon par Allah Ta'ala ki rehmatein aur us ka inaam hota hai aur kaafiron aur naafarmaan mominon par Allah Ta'ala ka azaab hota hai. Allah Ta’ala ke is inaam ya azaab ka taalluq murde ke jism aur rooh donon se hota hai, chaahe marne waale ka jism mitti mein khaak ho gaya ho ya aag mein jal gaya ho ya paani mein doob gaya ho ya darindon, parindon aur machhliyon wagaira ne kha kar hazam kar diya ho.

[Sharhul Aqeedatit Tahaawiyah Ibne Abil Iz: 1/396]

❧ Murde ke jism aur rooh se Allah Ta’ala ke inaam ya azaab ki kaifiyat wa haalat ka sahi ilm Allah Ta'ala hi ko hai, hamaari samajh mein aaye ya na aaye ham ko is par imaan laana zaroori hai.

❧ Murde ke saamne qayaamat tak rozaana subah wa shaam us ka thhikaana (Jannat ya dozakh) pesh kiya jaata hai, Jannati ko Jannat dikha kar khush khabri di jaati hai aur dozakhi ko dozakh dikha kar us ke khauf ko badhaaya jaata hai.

❧ Ham musalmaanon ka aqeda hai ke barzakh haq hai, har imaan waale ko is par imaan laana zaroori hai.

[Sahih Bukhaari: 1379]

  [[..Next - 42, Soon In sha Allah..]]

       ✮~~~~✮~~~~✮~~~~✮
 

                   *​✾  ​Hashr  ✾*

❧ Hashr ke maani hai jama hona. Qayaamat ke din soor phoonke jaane ke baad jab tamaam jaandaar mar jaayeinge, to ek muddat ke baad dobaara soor phoonka jaayega, jis se tamaam murde zinda ho jaayenge aur apni qabron se uthh kar ek maidaan mein jama honge usi ko “Hashr” kehte hain.

❧ Maidaane Hashr ek safed, narm aur chatiyal zameen hogi jis mein na koi teela hoga aur na koi imaarat ke aadmi us ke peechhe chhup jaaye, Allah Ta'ala tamaam makhlooq ko maidaane Hashr mein jama karega, us maidaan mein kuchh log paidal haazir honge aur kuchh sawaariyon par sawaar ho kar aur kaafir log munh ke bal chalte huwe maidaane Hashr mein pohncheinge.

[Muslim: 7233 ; Tirmizi: 3142]

❧ Us din ki ghabraahat ka yeh aalam hoga ke har shakhs apni apni fikr mein hoga, insaan apne bhaai, maan baap, bivi bachchon, dost ahbaab aur rishtedaaron se munh chhupaata phirega, duniya mein jin par jaan tak qurbaan kar deta tha aakhirat mein un se door bhaagega balke kuchh log to us din ke azaab se bachne ke liye apne biwi bachchon wagaira ko bhi badle mein dene ke liye tayyaar hoga.
*

*❧ Qur'aan mein hai:* Mujrim yeh chaahega ke us din ke azaab se chhootne ke liye apne bete fidye mein dede aur apni biwi aur apna bhaai aur apna woh khaandaan jo use panaah deta tha aur zameen ke saare ke saare baashinde phir (un sab ko fidye mein de kar) apne aap ko bachaale (lekin) aisa hargiz nahin ho sakega! woh to ek bhadakti hui aag hai jo khaal utaar legi.

[Sura-e-Ma'arij: 11-16]

❧ Us din sooraj zameen se bahot qareeb hoga, us ki garmi ki wajah se dimaag khaolne lagega aur zabaan taalu se lag jaayegi. Kaafir wa mushrik aur naafarmaan log paseene mein doobe huwe honge, jin ke gunah jis qadr ziyaada honge, woh usi qadr paseene mein doobe huwe honge, is kasrat se paseena niklega ke 70 gaz zameen mein jazb hojaayega, jab zameen paseena na pi sakegi to paseena oopar chedhega phir kisi ke takhnon tak pahonch raha hoga, kisi ke ghutnon tak, kisi ki kamar tak aur koi poora paseene mein dooba huwa hoga, log bhook aur pyaas ki shiddat se pareshaan honge magar us din Allah Ta'ala nek bandon ko apne Arsh ke saaye mein jagah inaayat farmaayega aur un ke liye khaane peene ka bhi intezaam farmaayega.

[Bukhaari: 6532 ; Muslim: 7385 ; Bukhaari: 660]

❧ Qayaamat ka ek din 50,000 saal ke baraabar hoga, Hisaab-o-Kitaab ke intezaar mein jab kaafi muddat guzar jaayegi aur logon ki pareshaani badhti jaayegi, to ghabra kar saare auwaleen wa aakhireen mil kar ek ek paigambar ke paas haazir honge aur Hisaab-o-Kitaab jald shuru kiye jaane ki sifaarish kareinge, tamaam ambiya Alaihissalam sifaarish se ma'zirat zaahir farmaayeinge phir akheer mein hamaare paigambar Hazrat Muhammad ﷺ khidmat mein sifaarish ke liye haazir honge, chunaanche Aap ﷺ sifaarish farmaayeinge, Aap ﷺ ke sifaarish farmaane ke baad Allah Ta'ala Arsh par tajalli farmaayeinge phir Hisaab-o-Kitaab shuru ho jaayega aur aamaal naame wazan kiye jaayeinge.

[Sahih Bukhaari: 7440]

       ✮~~~~✮~~~~✮~~~~✮
 

                 *​✾  ​Shafa'at  ✾*

❧ Shafa'at ke maani hain sifaarish karna. Qayaamat ke din nek logon ka bure logon ke haq mein Allah Ta‘ala ki ijaazat se sifaarish karna haq hai, Allah Ta'ala Ambiya, Auliya, Ulma aur Shohda wagaira ko gunahgaaron ke baare mein sifaarish karne ki ijaazat deinge; Bagair ijaazat ke koi sifaarish na kar sakega.

[Sharhul Aqeedadit Tahaawiyah Li Saaleh Bin Abdil Azeez: 1/205-206]

❧ Huzoor ﷺ ne farmaaya: Meri ummat mein se baaz log ek badi jamaat ki sifaarish kareinge, baaz ek qabeele ki, baaz 40 aadmiyon ki aur koi ek aadmi ki sifaarish karega.

[Tirmizi: 2440]

❧ Musalmaanon ke chhote bachche jo baalig hone se pehle mar jaate hain, woh bhi apne maan baap ki sifaarish kareinge aur Qur'aane Kareem aur nek aamaal bhi baaz logon ki sifaarish kareinge, kufr-o-shirk ke alaawa tamaam gunaahon ki sifaarish hogi, sab se pehle maidaane Hashr mein Huzoor ﷺ shafa'at kareinge, us ke baad hi dosre hazraat shafa'at kareinge, Aap ﷺ apni ummat ke liye mutaaddid baar shafa’at kareinge aur Allah Ta'ala bakhashte raheinge, yahaan tak ke har us shakhs ko jis ne sachche dil se kalima-e-tayyibah "Laa ilaaha illallaahu muhammadur rasoolullah" kaha aur usi par us ki maut aayi, to us ko bhi Dozakh se nikaal kar Jannat mein daakhil kar diya jaayega.

[Tirmizi: 2441]

       ✮~~~~✮~~~~✮~~~~✮
   

                 *​✾  ​Jannat  ✾*

❧ Jannat nihaayat hi aaraam ki jagah hai, woh imaan waalon ke liye tayyaar ki gai hai, us mein har tarah ki nematein hongi jo kabhi khatm na hongi, sone chaandi ki eeton ke mahlaat honge, doodh, shahad, saaf-o-shaffaaf paani aur behtareen qism ki paakizah sharaab ki nehrein hongi, har qism ke phal phool honge, baazaar honge jin mein Jannati ek doosre se mulaaqaat kareinge, un ke dilon mein bugz, keena aur hasad jaisi buri aadatein nahin raheingi, woh bhaai bhaai ban kar raheinge, woh us mein khaaeinge, piyeinge, unhein peshaab wa paakhaane ki haajat na hogi, ek khushgawaar dakaar aur mushk jaisa khushboodaar paseena aayega jis se meda khaali aur halka hojaayega, jo log ek baar Jannat mein jaaeinge phir wahaan se kabhi na nikaale jaaeinge, woh us mein hamesha hamesha raheinge.

*❧ Qur‘aan mein hai:* Allah ne momin mardon aur momin aurton se waada kiya hai aise baagaat ka jin ke neeche nehrein behti hongi, jin mein woh hamesha raheinge aur aise paakeeza makaanaat ka jo sadaabahaar baagaat mein honge. Aur Allah ki taraf se khushnoodi to sab se badi cheez hai (jo Jannat waalon ko naseeb hongi) yahi to zabardast kaamiyaabi hai.

[Sura-e-Tauba: 72]

❧ Jannat mein aisi aisi nematein hongi jin ko na kisi aankh ne dekha, na kisi kaan ne suna aur na kisi insaan ke dil mein un ka khayaal guzra, un nematon ke alaawa khuda ke fazl-o-karam se Jannatiyon ko 2 aisi nematein mileingi jo duniya mein kisi insaan ko haasil nahin hosakteen, ek nemat to yeh hai ke wahaan Jannati ki har khwaahish aur tamanna poori hogi aur doosri jo sab se badi nemat hai woh yeh ke Jannatiyon ko Allah Ta'ala ka deedaar naseeb hoga.

[Bukhaari: 3244; Sura-e-Zukhruf: 71 ; Sura-e-Yunus: 26]

❧ Jab tak Allah Ta’ala ki rehmat na ho Mahaz apne amal se koi Jannat mein nahin jaayega, albatta Allah Ta'ala imaan waalon ko apni rehmat se Jannat mein daakhil farma kar un ke aamaal ke etebaar se Jannat mein darjaat ata farmaaeinge, jin mein sab se aalaa darja Jannatul Firdaus hai.

❧ Ham musalmaanon ka aqeeda hai ke Jannat abhi maujood hai aur hamesha ke liye rahegi, is ke mutaalliq Qur'aan-o-Hadees mein bataai hui tamaam baatein sachchi hain.

[Sharhul Aqeedatit Tahaawiyah Ibne Abil Iz: 1/420 ; Bukhaari: 2790]

       ✮~~~~✮~~~~✮~~~~✮
  

              *​✾  ​Jahannam  ✾*

❧ Jahannam nihaayat hi takleef ki jagah hai, woh kaafiron aur mushrikon ke liye tayyaar ki gai hai, us mein har tarah ke azaab honge, aag ke makaan aur bistar honge, aag ki hathkadiyaan aur zanjeerein hongi, bade bade saanp aur bichchhu honge, jo jahannamiyon ko daste raheinge, khaane ke liye zaqqoom (Jahannam ka ek kaantedaar darakht) hoga, peene ke liye peep aur khaulta huwa pani hoga, jo aanton ko tukde tukde kar dega, Jahannam ki dahekti hui aag hogi, jo un ko jalaati rahegi, aag se itne bade bade shole utheinge, jo aalishaan mahal ke baraabar honge, jab bhi jahannamiyon ke badan ki khaal jal kar raakh hojaayegi, to us ki jagah doosri khaal badal di jaayegi, har ghadi Allah Ta’ala ka azaab un ke liye sakht hota jaayega, azaab ka ek lamha umr bhar ke aish wa raahat ko bhulaadega, na un ka azaab halka hoga aur na un ko koi mohlat di jaayegi, woh maut maangeinge to un ko maut na aayegi, hamesha hamesh ke liye woh dozakh mein raheinge.

❧ Qur'aan mein Allah Ta'ala farmaate hain: Aur jin logon ne kufr ki rawish apnaali hai, un ke liye dozakh ki aag hai, na to un ka kaam tamaam kiya jaayega ke woh mar hi jaaein aur na un se dozakh ka azaab halka kiya jaayega. Har naashukre kaafir ko ham aisi hi saza dete hain.

 [Sura-e-Faatir: 36]

❧ Jahannam mein sab se kam darje ka azaab yeh hoga ke jahannami ko aag ki jootiyaan ya aag ke 2 tasme pehnaaye jaayeinge, jis ki wajah se us ka dimaag haandi ki tarah ublega, woh samjhega ke sab se ziyaada azaab usi ko ho raha hai, jis jahannami ke dil mein zarra baraabar imaan hoga woh apne gunaah ke baqadr azaab chakh kar ya Huzoor ﷺ ki shafa'at se  Jahannam se chhutkaara paalega.

[Bukhaari: 6562 ; Bukhaari: 7510]

❧ Jahannam mein bhi alag alag darje hain, un mein mukhtalif qism ka azaab hoga, mujrim log apne apne gunaahon ke mawaafiq un mein daakhil kiye jaayeinge, jo bhi Jahannam mein daakhil hoga woh mahaz Allah Ta'ala ke Adl-o-Insaaf se daakhil hoga kisi par zarra baraabar zulm na kiya jaayega.

❧ Ham musalmaanon ka aqeeda hai ke Jahannam abhi maujood hai aur hamesha ke liye rahegi, us ke mutaalliq Qur'aan-o-Hadees mein bataai hui tamaam baatein sachchi hain.

[Umdatul Qaari: 27/135: Sharhul Aqeedatit Tahaawiyah Li Ibne Abil Iz: 1/420]

       ✮~~~~✮~~~~✮~~~~✮

          *​✾  ​Sawaal - Jawaab  ✾*

*❧ Sawaal :​* Hamaara Rab kaun hai?

*❧ Jawaab :​* Hamaara Rab Allah hai.

[Sura-e-Ha Meem Sajda: 30]

*❧ Sawaal :​* Hamein kis ne paida kiya?

*❧ Jawaab :​* Hamein Allah Ta'ala ne paida kiya.

[Sura-e-Teen: 4]

*❧ Sawaal :​* Kya poori duniya ke logon ko tanha Allah hi ne paida kiya?

*❧ Jawaab :​* Ji haan ! Poori duniya ke logon ko tanha Allah hi ne paida kiya.

[Sure-e-Sajda: 4]

*❧ Sawaal :​* Kya yeh duniya khud bakhud ban gayi?

*❧ Jawaab :​* Nahin ; is duniya ko Allah Ta'ala ne banaaya.

[Sura-e-Sajda: 4]

*❧ Sawaal :​* Aasmaan, zameen, chaand, sooraj, oonche oonche pahaad aur bade bade darya kis ne banaaye?

*❧ Jawaab :​* Aasmaan, zameen, chaand, sooraj, oonche oonche pahaad aur bade bade darya Allah Ta'ala hi ne banaaye.

[Sura-e-Ankaboot: 61, Sura-e-Qaaf: 38]

*❧ Sawaal :​* Kya Allah Ta'ala ko kisi ne paida kiya?

*❧ Jawaab :​* Nahin ! Allah Ta'ala ko kisi ne paida nahin kiya.

[Sura-e-Ikhlaas: 3]

*❧ Sawaal :​* Allah Ta'ala kab se hai aur kab tak rahega?

*❧ Jawaab :​* Allah Ta'ala hamesha se hai aur hamesha rahega.

[Sura-e-Rahmaan: 27]

*❧ Sawaal :​* Kya Allah Ta'ala ke maan baap hain? 

*❧ Jawaab :​* Nahin ! Allah Ta'ala ke maan baap nahin hain.

[Sura-e-Ikhlaas: 3]

*❧ Sawaal :​* Kya Allah Ta'ala ke beewi bachche hain?

*❧ Jawaab :​* Nahin ! Allah Ta'ala ke beewi bachche nahin hain.

[Sura-e-An'aam: 101]

*❧ Sawaal :​* Kya Allah Ta'ala ki kisi se rishtedaari hai?

*❧ Jawaab :​* Nahin ! Woh tamaam rishton se paak hai.

[Sura-e-Ikhlaas: 3]

*❧ Sawaal :​* Kya makhlooq ki tarah Allah Ta'ala ki shakl-o-soorat hai?

*❧ Jawaab :​* Nahin ! Allah Ta'ala shakl-o-soorat se paak hai.

[Sura-e-Shoora: 11]

*❧ Sawaal :​* Kya Allah Ta'ala khaata, peeta aur sota hai?

*❧ Jawaab :​* Allah Ta'ala ko khaane peene aur sone ki zaroorat nahin.

[Sura-e-An'aam: 14, Sura-e-Baqarah: 255]
*

*❧ Sawaal :​* Kya Allah Ta'ala ka koi shareek hai?

*❧ Jawaab :​* Allah Ta’ala ka koi shareek nahin.

[Sura-e-An'aam: 163]

*❧ Sawaal :​* Hamein, hamaare maan baap aur poori duniya ko rozi kaun deta hai?

*❧ Jawaab :​* Hamein, hamaare maan baap aur poori duniya ko rozi Allah Ta'ala deta hai.

[Sura-e-Zaariyaat: 58] 

*❧ Sawaal :​* Zindagi, maut, izzat aur zillat kaun deta hai?

*❧ Jawaab :​* Zindagi, maut, izzat aur zillat Allah Ta'ala deta hai.

[Sura-e-Mulk: 2, Sura-e-Aal-e-Imraan: 26]

*❧ Sawaal :​* Kya Allah Ta'ala har cheez dekhta hai aur har baat sunta hai?

*❧ Jawaab :​* Ji haan ! Allah Ta'ala har cheez dekhta hai aur har baat sunta hai.

[Sura-e-Asra: 1]

*❧ Sawaal :​* Hamein kis ki ibaadat karni chaahiye?

*❧ Jawaab :​* Hamein sirf Allah Ta'ala ki ibaadat karni chaahiye.

[Sura-e-Hood: 26]

*❧ Sawaal :​* Farishte kaun hain?

*❧ Jawaab :​* Farishte Allah Ta'ala ki Nooraani makhlooq hain, jinhein "Malaaika" bhi kehte hain.

[Sahih Muslim: 7687]

*❧ Sawaal :​* Kya Farishte khaane peene ke mohtaaj hain?

*❧ Jawaab :​* Nahin ! Farishte khaane peene ke mohtaaj nahin hain.

[Fathul Baari: 9/492]  

*❧ Sawaal :​* Kya Farishte Allah Ta'ala ki na farmaani karte hain?

*❧ Jawaab :​* Nahin ! Farishte Allah Ta'ala ki na farmaani nahin karte.

[Sura-e-Tahreem: 6]

*❧ Sawaal :​* Allah Ta'ala ne farishton ko kya taaqat de rakhi hai?

*❧ Jawaab :​* Allah Ta'ala ne farishton ko mushkil kaamon ke karne ki taaqat de rakhi hai.

[Sura-e-Faatir: 1]

*

*❧ Sawaal :​* Farishte kitne hain?

*❧ Jawaab :​* Farishte beshumaar hain, un ki ta'adaad Allah Ta'ala ke alaawa koi nahin jaanta.

[Sura-e-Muddassir: 31]

*❧ Sawaal :​* Chaar mashhoor farishte kaun kaun se hain?

*❧ Jawaab :​* Hazrat Jibraeel Alaihissalam, Hazrat Meekaail Alaihissalam, Hazrat Israafeel Alaihissalam, Hazrat Izraaeel Alaihissalam

[Umdatul Qaari: 22/458]   

*❧ Sawaal :​* Hazrat Jibraeel Alaihissalam ka kya kaam hai?

*❧ Jawaab :​* Hazrat Jibraeel Alaihissalam Allah ki kitaabein aur paigaamaat Rasoolon tak pahonchaate the. 

[Sharhul Arba'een Navaviyyah Li'atiyah: 6/3]

*❧ Sawaal :​* Hazrat Meekaail Alaihissalam ka kya kaam hai?

*❧ Jawaab :​* Hazrat Meekaail Alaihissalam ke zimme baarish barsaane aur makhlooq ko rozi pahonchaane ka kaam hai.

[Sho'abul Imaan: 158]

   ✍ Ref: Deeniyat Course book
*

*❧ Sawaal :​* Hazrat Israafeel Alaihissalam ka kya kaam hai?

*❧ Jawaab :​* Hazrat Israafeel Alaihissalam Qayaamat ke din soor phoonkeinge.

[Sho'abul Imaan: 353]

*❧ Sawaal :​* Hazrat Izraaeel Alaihissalam ka kya kaam hai?

*❧ Jawaab :​* Hazrat Izraaeel Alaihissalam ka kaam makhlooq ki jaan nikaalna hai, jinhein "Malakul Maut" bhi kehte hain.

[Musannaf Ibn-e-Abi Shaibah: 34969]   

*❧ Sawaal :​* Aamal likhne waale farishton ko kya kehte hain?

*❧ Jawaab :​* Aamal likhne waale farishton ko "Kiraaman Kaatibeen" kehte hain.

[Sura-e-Infitaar: 11]

*❧ Sawaal :​* Aafaton aur balaaon se insaan ki hifaazat karne waale farishton ko kya kehte hain?

*❧ Jawaab :​* Aafaton aur balaaon se insaan ki hifaazat karne waale farishton ko "Hafazah" kehte hain.

[Sura-e-An'aam: 61]

*❧ Sawaal :​* Qabr mein sawaal karne waale farishton ko kya kehte hain?

*❧ Jawaab :​* Qabr mein sawaal karne waale farishton ko "Munkar Nakeer" kehte hain.

[Tirmizi: 1071]

         *✾ Aasmaani Kitaaein ✾*

*❧ Sawaal :​* Allah Ta'ala ne kitaabein kyun naazil farmaeein?

*❧ Jawaab :​* Allah Ta'ala ne insaanon ki hidaayat ke liye kitaabein naazil farmaeein.

[Sura-e-Aal-e-Imraan: 3,4]   

*❧ Sawaal :​* Allah Ta'ala ki kitaabein kitni hain?

*❧ Jawaab :​* Chhoti badi bahot saari kitaabein hain.

[Saheeh Ibn-e-Hibbaan: 361]

*❧ Sawaal :​* Allah Ta'ala ki chhoti aur badi kitaabon ko kya kehte hain?

*❧ Jawaab :​* Chhoti kitaab ko "Saheefa" aur badi kitaab ko "Kitaab" kehte hain.

[Roohul Ma'aani : 30/111]

*❧ Sawaal :​* Chaar Mashhoor "Aasmaani Kitaabein" kaun kaun si hain?

*❧ Jawaab :​* Taurait, Zaboor, Injeel aur Qur'aan-e-Majeed.

[Saheeh Ibn-e-Hibbaan: 361]

*❧ Sawaal :​* "Taurait" kis Nabi par naazil hui?

*❧ Jawaab :​* Taurait Hazrat Moosa Alaihissalam par naazil hui.

[Sahih Muslim: 4536]   

*❧ Sawaal :​* "Zaboor" kis Nabi par naazil hui?

*❧ Jawaab :​* Zaboor Hazrat Dawood Alaihissalam par naazil hui.

[Sura-e-Nisa: 163]

*❧ Sawaal :​* "Injeel" kis Nabi par naazil hui?

*❧ Jawaab :​* Injeel Hazrat Isa Alaihissalam par naazil hui.

[Sura-e-Hadeed: 27]

*❧ Sawaal :​* "Qur'aan-e-Majeed" kis Nabi par naazil huwa?

*❧ Jawaab :​* Qur'aan-e-Majeed hamaare Nabi Hazrat Muhammad ﷺ par naazil huwa.

[Sura-e-Dahal: 23]

*❧ Sawaal :​* "Saheefe" kin paigambaron par naazil huwe?

*❧ Jawaab :​* Saheefe Hazrat Shees Alaihissalam, Hazrat Idrees Alaihissalam, Hazrat Ibrahim Alaihissalam aur un ke alaawa doosre paigambaron par naazil huwe.

[Saheeh Ibn-e-Hibbaan: 361]   

*❧ Sawaal :​* Sab se aakhir mein kaunsi kitaab naazil hui?

*❧ Jawaab :​* Sab se aakhir mein Qur'aan-e-Majeed naazil huwa.

[Tafseer Bahrul Uloom: 1/586]

*❧ Sawaal :​* Kya Quraan-e-Majeed mein koi tabdeeli ho sakti hai?

*❧ Jawaab :​* Qur'aan-e-Majeed mein koi tabdeeli nahin ho sakti.

[Sura-e-An'aam: 115]

*❧ Sawaal :​* Qur'aan-e-Majeed ki hifaazat ki zimmedaari kis ne li hai?

*❧ Jawaab :​* Quraan-e-Majeed ki hifaazat ki zimmedaari Allah Ta'ala ne le rakhi hai.

[Sura-e-Hijr: 9]

*❧ Sawaal :​* Aasmaani kitaabon mein sab se afzal kitaab kaun si hai?

*❧ Jawaab :​* Aasmaani kitaabon mein sab se afzal kitaab Qur'aan-e-Majeed hai.

[Tafseer-e-Sa'adi: 1/234]

*❧ Sawaal :​* Ab qayaamat tak kis kitaab par amal karna zaroori hai?

*❧ Jawaab :​* Ab qayaamat tak sirf Qur'aan-e-Majeed par amal karna zaroori hai.

[Sahih Muslim: 6378]

*❧ Sawaal :​* Allah Ta'ala ki kitaabon aur saheefon ke baare mein kya Imaan rakhna chaahiye?

*❧ Jawaab :​* Allah Ta'ala ki kitaabon aur saheefon ke baare mein yeh Imaan rakhna chaahiye ke tamaam kitaabein aur saheefe Allah Ta'ala ki taraf se naazil huwe hain.

[Sura-e-Baqara: 4]

*❧ Sawaal :​* "Rasool" kise kehte hain?

*❧ Jawaab :​* Allah Ta'ala ke bheje huwe paigambar ko Rasool kehte hain.

[Sharahul Aqeedah At Tahaawiya: 1/1656]

*❧ Sawaal :​* Allah Ta'ala ne Rasool kyun bheje?

*❧ Jawaab :​* Allah Ta'ala ne insaanon ko seedha raasta dikhaane ke liye Rasool bheje.

[Sura-e-Talaaq: 11]

*❧ Sawaal :​* Rasool kaun hote hain?

*❧ Jawaab :​* Rasool, Allah ke bande aur sab se achche insaan hote hain.

[Sura-e-Ibrahim: 11-12]

*❧ Sawaal :​* Rasool hamein kin baaton ki taaleem dete hain?

*❧ Jawaab :​* Rasool hamein achchhi achchhi baaton ki taaleem dete hain.

[Sura-e-Aale Imraan: 164]

*❧ Sawaal :​* Kya Rasool kabhi jhoot bolte hain?

*❧ Jawaab :​* Nahin, Rasool kabhi jhoot nahin bolte.

[Sura-e-Najm: 3-4]

*❧ Sawaal :​* Kya Rasool kabhi gunaah karte hain? 

*❧ Jawaab :​* Nahin, Rasool gunaahon se paak hote hain.

[Mirqaatul Mafaateeh: 1/300]

*❧ Sawaal :​* Kya Rasool kabhi kisi paigaam ko chhupaate hain?

*❧ Jawaab :​* Nahin, woh Allah ka har paigaam bandon tak pahonchaate hain.

[Sura-e-Ahzaab : 39]

*❧ Sawaal :​* "Rasool" aur "Nabi" kitne hain?

*❧ Jawaab :​* Rasool aur Nabi ki thheek thheek ta'adaad sirf Allah Ta'ala hi jaanta hai.

[Sharahut Tahaawiya Li Sadruddin: 2/234]

*❧ Sawaal :​* Hamaare Nabi ka naam kya hai?

*❧ Jawaab :​* Hamaare Nabi ka naam Hazrat “Muhammad" ﷺ hai.

[Sura-e-Ahzaab: 40]

*❧ Sawaal :​* Sab se pehle Nabi kaun hain?

*❧ Jawaab :​* Sab se pehle Nabi Hazrat Aadam Alaihissalam hain.

[Musnad Ahmad: 21552]

*❧ Sawaal :​* Sab se aakhri Nabi kaun hain?

*❧ Jawaab :​* Sab se aakhri Nabi Hazrat Muhammad ﷺ hain.

[Sura-e-Ahzaab: 40]

*❧ Sawaal :​* Kya hamaare Nabi Hazrat Muhammad ﷺ ke baad qayaamat tak koi naya Nabi aayega?

*❧ Jawaab :​* Hamaare Nabi Hazrat Muhammad ﷺ ke baad qayaamat tak koi naya Nabi nahin aayega.

[Bukhaari: 3455]

*❧ Sawaal :​* Hamaare Nabi ﷺ ke baad jo shakhs apne Nabi hone ka daawa kare woh kaisa hai?

*❧ Jawaab :​* Hamaare Nabi ﷺ ke baad jo shakhs apne Nabi hone ka daawa kare woh sab se bada jhoota hai.

[Mustadrak: 8390]

*❧ Sawaal :​* Tamaam nabiyon mein sab se afzal kaun hain?

*❧ Jawaab :​* Tamaam nabiyon mein sabse afzal hamaare Nabi Hazrat Muhammad ﷺ hain.

[Sahih Muslim: 1195]

*❧ Sawaal :​* Rasoolon par Imaan laane ka kya matlab hai?

*❧ Jawaab :​* Rasoolon par Imaan laane ka matlab yeh hai ke ham un sab ko Allah ka sachcha rasool samjhein.

[Sura-e-baqarah: 285]

*❧ Sawaal :​* Qayaamat ka din kise kehte hain?

*❧ Jawaab :​* Jis din tamaam insaan mar jaayeinge, zameen -o-aasmaan aur poori kaainaat tabaah-o-barbaad ho jaayegi, us din ko "Qayaamat ka din" kehte hain.

[Sura-e-Haaqqa: 13-16]

*❧ Sawaal :​* Tamaan insaan aur jaandaar kaise mar jaayeinge?

*❧ Jawaab :​* Hazrat Israafeel Alaihissalam soor phoonkeinge, jis ki daraawni aawaaz se sab mar jaayeinge aur har cheez toot phoot kar fana ho jaayegi.

[Sura-e-Zumar: 68]

*❧ Sawaal :​* Qayaamat kab aayegi?

*❧ Jawaab :​* Us ka thheek waqt Allah Ta'ala ke alaawa koi nahin jaanta.

[Sura-e-Luqmaan: 34]

*❧ Sawaal :​* Kya hamaare paigambar ﷺ ne qayaamat ki kuchh nishaaniyaan bataai hain jin ko dekh kar qayaamat ka qareeb aana maaloom ho sakta hai?

*❧ Jawaab :​* Ji haan.

[Sahih Muslim: 102]

*❧ Sawaal :​* Qayaamat ki nishaaniyaan kya hain?

*❧ Jawaab :​* Qayaamat ki bahot si nishaaniyaan hain jaise : Duniya mein gunaah ziyaada honge, log apne maan baap ki na farmaaniyaan kareinge, naach gaana aam ho jaayega, Hazrat Mehdi RaziyAllahu anhu zaahir honge, kaana Dajjaal niklega, us ko qatl karne ke liye Hazrat Isa Alaihissalam aasmaan se utreinge, Yaajooj Maajooj nikleinge, sooraj magrib se niklega, Qur'aan Majeed uthha liya jaayega, saare musalmaan mar jaayeinge aur tamaam duniya kaafiron se bhar jaayegi, jab yeh saari cheezein ho-jaayeingi to us waqt Hazrat Israafeel Alaihissalam soor phoonkeinge aur qayaamat qaaim hojaayegi.

[Sahih Muslim: 7467, Sahih Muslim: 7590, Tirmizi:  2210, As Sunanil Waaridati Fil Fitan: 3/595]

  *

*❧ Sawaal :​* Taqdeer kise kehte hain?

*❧ Jawaab :​* Saare aalam mein jo kuchh huwa, hota hai aur hoga, tamaam cheezon ka Allah Ta'ala ko pehle se ilm hai, Allah Ta'ala ke isi ilm ko "Taqdeer" kehte hain.

[Sharahul Aqeedah At Tahaawiyah: 272]

*❧ Sawaal :​* Achchhe bure haalaat sab kis ki taraf se hain? 

*❧ Jawaab :​* Achchhe bure haalaat sab Allah Ta'ala ki taraf se hain.

[Sura-e-Nisa: 78]

*❧ Sawaal :​* Agar achchhe haalaat pesh aayein, to kya karna chaahiye?

*❧ Jawaab :​* Agar achchhe haalaat pesh aayein, to Allah Ta'ala ka shukr ada karna chaahiye.

[Sahih Muslim: 7692]

*❧ Sawaal :​* Agar bure haalaat pesh aayein, to kya karna chaahiye?

*❧ Jawaab :​* Agar bure haalaat pesh aayein, to tauba wa istigfaar karna chaahiye.

[Sahih Muslim: 7692]

*❧ Sawaal :​* Jin cheezon ka hona muqaddar hai kya unko koi rok sakta hai?

*❧ Jawaab :​* Jin cheezon ka hona muqaddar hain un ko koi rok nahin sakta.

[Abu Dawood: 4700]

*❧ Sawaal :​* Taqdeer ke baare mein hamein kya taaleem di gayi hai?

*❧ Jawaab :​* Taqdeer ke baare mein hamein taaleem di gayi hai ke us ke baare mein koi bahes aur hujjat na karein.

[Tirmizi: 2133]

*❧ Sawaal :​* Pehli ummatein kyun halaak huweein?

*❧ Jawaab :​* Pehli ummaten taqdeer ke baare mein bahes aur hujjat karne ki wajah se halaak huweein.

[Tirmizi: 2133]

*❧ Sawaal :​* Kya marne ke baad dobaara zinda hona hai?

*❧ Jawaab :​* Ji haan, marne ke baad dobaara zinda hona hai.

[Sura-e-Saaffaat: 16-18]

*

*❧ Sawaal :​* Ba'as ba'adal maut (marne ke baad dobaara zinda hona) kise kehte hain?

*❧ Jawaab :​* Jab qayaamat mein saari cheezein fana ho jaayeingi aur Hazrat Israafeel Alaihissalam doosri martaba soor phoonkeinge phir Allah Ta'ala ke hukm se saara aalam dobaara paida hoga aur tamaam murda insaan aur haiwaan zinda ho jaayeinge aur maut ke baad ki zindagi shuru ho jaayegi, isi ko "Baas ba'adal maut" (Marne ke baad dobaara zinda hona) kehte hain.

[Sura-e-Yaaseen: 51]

*❧ Sawaal :​* Kya marne ke baad dobaara zinda karna Allah Ta'ala ke liye mushkil hai?

*❧ Jawaab :​* Marne ke baad dobaara zinda karna Allah Ta'ala ke liye koi mushkil nahin.

[Sura-e-Qiyaama: 4]

*❧ Sawaal :​* Dobaara zinda hone ke baad kya hoga?

*❧ Jawaab :​* Dobaara zinda hone ke baad achchhe bure aamaal ka hisaab hoga.

[Sura-e-Zilzaal: 6-8]
*

*❧ Sawaal :​* Hisaab lene ke baad kya hoga?

*❧ Jawaab :​* Hisaab lene ke baad Jannat aur Jahannam ka faisla hoga.

[Sura-e-Mominoon: 102, 103]

*❧ Sawaal :​* Jannat kaisi jagah hai?

*❧ Jawaab :​* Jannat nihaayat hi aaraam ki jagah hai.

[Sura-e-Dahar: 12-14]

*❧ Sawaal :​* Jannat kis ke liye tayyaar ki gayi hai?

*❧ Jawaab :​* Jannat Imaan waalon ke liye tayyaar ki gayi hai.

[Surah-e-Nisa: 57]

*❧ Sawaal :​* Jannatiyon ko kaun kaun si nematein mileingi?

*❧ Jawaab :​* Jannatiyon ko Jannat mein sone, chaandi ki eenton ke mahallaat, doodh aur shahed ki nehrein, har qism ke phal aur phool aur jin cheezon ki Jannati tamanna kareinge woh sab mileingi.

[Sura-e-Zukhruf: 71, Sura-e-Muhammad: 15, Tirmizi: 2526]

*❧ Sawaal :​* Kya Jannatiyon ko Jannat mein kabhi maut aayegi?

*❧ Jawaab :​* Nahin ! Balke Jannati Jannat mein hamesha hamesh raheinge.

[Tirmizi: 2557]

*❧ Sawaal :​* Jahannam kaisi jagah hai?

*❧ Jawaab :​* Jahannam nihaayat hi takleef ki jagah hai.

[Sura-e-Naba: 21-25]

*❧ Sawaal :​* Jahannam kis ke liye tayyaar ki gayi hai?

*❧ Jawaab :​* Jahannam kaafiron aur mushrikon ke liye tayyaar ki gayi hai.

[Sura-e-Aal-e-Imraan: 131, Sura-e-Baiyyinah: 6]

*❧ Sawaal :​* Jahannam mein kya kya hoga?

*❧ Jawaab :​* Jahannam mein bade bade saanp aur bichchhu honge, peene ke liye khaulta huwa paani aur peep aur khaane ke liye kaantedaar darakht honge.

[Musnad-e-Ahmad: 17712, Sura-e-Saad: 57]

   *[[..Alhamdulillah Mukammal..]]*

   ✍ Ref: Deeniyat Course book

          ❅〰❅❅〰〰〰〰❅❅〰❅